അമ്പലപ്പുഴ മേല്‍പാലം നിറയെ അപകടക്കുഴികൾ

അമ്പലപ്പുഴ: അപകടക്കെണിയായി കാക്കാഴം റെയിൽവേ മേൽപാലത്തിലെ കുഴികള്‍. എച്ച്​. സലാം എം.എല്‍.എ ഇടപെട്ടിട്ടും കുഴികള്‍ അടക്കുന്ന കാര്യത്തില്‍ പൊതുമരാമത്ത് നടപടി സ്വീകരിച്ചിട്ടില്ല​. മഴ ശക്തമായതോടെ കുഴികൾ ഗർത്തങ്ങളായി. അപകടങ്ങളും പരാതികളും വ്യാപകമാകുമ്പോൾ ചെറിയ ചാക്കുകളിൽ ഗ്രാവലുമായെത്തി കുഴി മൂടൽ പ്രഹസനമാണ്​ നടക്കുന്നത്​. ഉദ്യോഗസ്ഥർ പാലമിറങ്ങുന്നതിന് മുമ്പ്​ തന്നെ കുഴി പഴയ അവസ്ഥയാകും. ഇപ്പോൾ പാലത്തി‍ൻെറ എല്ലാ ഭാഗങ്ങളിലും വലിയകുഴികളാണ്​​. ഇതിൽ വീണ് അപകടമുണ്ടാകാത്ത ദിവസങ്ങളില്ല. കൂടുതലും അപകടത്തിൽപ്പെടുന്നത് ഇരുചക്രവാഹനക്കാരാണ്. രാത്രിയിലാണ്​ ഏറെയും. കഴിഞ്ഞദിവസം രാത്രി രണ്ട്​ വാഹനങ്ങൾ കൂട്ടിയിടിച്ച് ദമ്പതികൾക്ക് പരിക്കേറ്റിരുന്നു. അപകടം നടന്നതിന് പിന്നാലെ യാത്രക്കാരുടെയും നാട്ടുകാരുടെയും പ്രതിഷേധം ശക്തമായതോടെ ​പൊലീസെത്തി രാത്രിയിൽത്തന്നെ കുഴി താൽക്കാലികമായി അടച്ചു. അപ്പോഴും കുഴിയടക്കേണ്ട ഉദ്യോഗസ്ഥർ അനങ്ങിയില്ല. സ്കൂൾ തുറന്നതോടെ റോഡിൽ തിരക്ക് നിയന്ത്രണാതീതമാണ്​. കാറുകളും ഇരുചക്ര വാഹനങ്ങളും കുഴികളിൽവീണ് ടയർ പഞ്ചറാകുകയും പൊട്ടുകയും ചെയ്യുന്നത് പതിവാണ്​. നിരവധി പേരാണ് ഗുരുതര പരിക്കേറ്റ്​ ചികിത്സയിൽ കഴിയുന്നത്.