രാഹുൽ ഗാന്ധിയുടെ രാഷ്ട്രീയമല്ല ഇടതുപക്ഷത്തിന്‍റേത് -എ.എ. റഹീം

അമ്പലപ്പുഴ: തെരഞ്ഞെടുപ്പില്‍ പരാജയം നേരിടേണ്ടിവന്നപ്പോൾ മാസങ്ങളോളം വീടിനകത്ത്​ വിഷാദവൃത്തത്തിൽ പെട്ടുപോയ രാഹുൽ ഗാന്ധിയുടെ രാഷ്ട്രീയമല്ല ഇടതുപക്ഷത്തിന്‍റേതെന്ന് ഡി.വൈ.എഫ്.ഐ അഖിലേന്ത്യ പ്രസിഡന്‍റ്​ എ.എ. റഹീം. ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ ആറാംവർഷത്തിലേക്ക് കടന്ന ഡി.വൈ.എഫ്.ഐയുടെ ഉച്ചഭക്ഷണ വിതരണം ഉദ്ഘാടനം ചെയ്യുകയായിരുന്നു അദ്ദേഹം. ഒരു പരാജയത്തിലും തകർന്നുപോകുന്നതല്ല ഇടതുരാഷ്ട്രീയം. ഇപ്പോഴുണ്ടായ ഫലം പ്രതീക്ഷിച്ചതല്ലെന്നും വിഷമിപ്പിക്കുന്നതാണെന്നും റഹീം പറഞ്ഞു. ജില്ല പ്രസിഡന്‍റ്​ ജയിംസ് ശാമുവൽ അധ്യക്ഷനായി. പൊതിച്ചോര്‍ വിതരണം ആറാംവര്‍ഷത്തിലേക്ക് അമ്പലപ്പുഴ: വയർ എരിയുന്നവരുടെ മിഴി നിറയാതിരിക്കാൻ ഡി.വൈ.എഫ്.ഐ വണ്ടാനം മെഡിക്കൽ കോളജ് ആശുപത്രിയിൽ നൽകുന്ന പൊതിച്ചോർ വിതരണം ആറാം വർഷത്തിലേക്ക്. ജില്ലയിലെ വിവിധ ഏരിയ കമ്മിറ്റികൾക്ക്​ കീഴിലെ 155 മേഖല കമ്മിറ്റികളിൽ ഓരോ കമ്മിറ്റി അംഗങ്ങളാണ് നിശ്ചയിക്കപ്പെട്ട ദിവസം വീടുകളിൽനിന്ന് പൊതിച്ചോറുകൾ സമാഹരിച്ച് ആശുപത്രിയിൽ എത്തിക്കുന്നത്. 45,62,500 പൊതിച്ചോറുകളാണ് കഴിഞ്ഞ 1825 ദിവസങ്ങളിലായി വിതരണം ചെയ്തത്. (ഡി.വൈ.എഫ്.ഐ അഖിലേന്ത്യ പ്രസിഡൻറ് എ.എ. റഹീം പൊതിച്ചോര്‍ വിതരണം ഉദ്ഘാടനം ചെയ്യുന്നു)