ആക്സിഡന്റ് ബ്ലാക്ക് സ്പോട്ട്​ പുനർനിർണയം; റിപ്പോർട്ട്​ ഒരാഴ്ചക്കുള്ളിൽ

ആലപ്പുഴ: സംസ്ഥാനത്ത് തുടർച്ചയായി വാഹനാപകടമുണ്ടാകുന്ന മേഖലകൾ (ആക്സിഡന്റ് ബ്ലാക്ക് സ്പോട്ട്​) പുനർനിർണയിക്കാനുള്ള റിപ്പോർട്ട് അടുത്തയാഴ്ച പൂർത്തിയാകും. കോവിഡ് കാരണം മൂന്ന്​ വർഷമായി ബ്ലാക്ക് സ്പോട്ട് പുനർനിർണയം നടന്നിട്ടില്ല. റിപ്പോർട്ടിന്റെ കരട് കഴിഞ്ഞ വർഷം നാറ്റ്പാക് റോഡ് സുരക്ഷ അതോറിറ്റിക്ക്​ കൈമാറിയിരുന്നു. അതോറിറ്റിയുടെ നിർദേശങ്ങൾകൂടി ലഭിച്ചാലേ അന്തിമ റിപ്പോർട്ട് തയാറാക്കാൻ കഴിയൂ. അത് ഉടൻ ലഭിക്കുമെന്നാണ് നാറ്റ്പാക് പ്രതീക്ഷ. ക്ലസ്റ്റർ ബ്ലാക്ക് സ്പോട്ടുകളുടെ എണ്ണം ഇത്തവണ 4000 ൽ കൂടുമെന്നാണ്​ നാറ്റ്പാക് അധികൃതരുടെ നിഗമനം. അടുത്തടുത്തു വരുന്ന സ്പോട്ടുകളെ ഓരോന്നായി പരിഗണിക്കാതെ ക്ലസ്റ്ററായി നിയന്ത്രണമേർപ്പെടുത്താൻ ആലോചനയുണ്ട്. 2018 മുതൽ 2020 വരെയുള്ള അപകടങ്ങളുടെ കണക്ക്​ പ്രകാരമാണ് ബ്ലാക്ക് സ്പോട്ടുകൾ നിശ്ചയിക്കുന്നത്. കൂടുതൽ അപകടങ്ങൾ നടക്കുന്ന 75 സ്ഥലങ്ങളിൽ സുരക്ഷ സംവിധാനമുണ്ടാക്കാനുള്ള പദ്ധതി 2019ൽ നാറ്റ്പാക് നൽകിയിരുന്നു. മൂന്ന്​ വർഷത്തിനുള്ളിൽ മരണങ്ങൾക്കും ഗുരുതര പരിക്കുകൾക്കും കാരണമായ അഞ്ച്​ അപകടങ്ങളുണ്ടായ 500 മീറ്റർ ഭാഗം, അല്ലെങ്കിൽ മൂന്ന്​ വർഷത്തിനുള്ളിൽ 10 മരണം സംഭവിച്ച അഞ്ച്​ അപകടങ്ങളുണ്ടായ 500 മീറ്റർ എന്നത്​​ കണക്കിലെടുത്താണ്​ കേന്ദ്ര സർക്കാറിന്റെ നിബന്ധന പ്രകാരം ദേശീയപാതയിലെ ബ്ലാക്ക് സ്പോട്ട് നിർണയം. ഫാദർ.ബിജോയ് അറക്കൽ ഡയറക്​ടർ പുന്നപ്ര: മാർ ഗ്രിഗോറിയോസ് ഇടവക വികാരി ഫാദർ ബിജോയ് അറക്കലിനെ തിരുവനന്തപുരം ലൂർദ് മാതാ കോളജ് ഓഫ് സയൻസ്​ & ടെക്നോളജിയുടെയും ലൂർദ് മാതാ ഗ്രൂപ്​ ഓഫ് ഇൻസ്റ്റിറ്റ്യൂഷൻസിന്‍റെയും ഡയറക്ടറായി ചങ്ങനാശ്ശേരി അതിരൂപത ആർച്​ ബിഷപ് മാർ ജോസഫ് പെരുന്തോട്ടം നിയമിച്ചു. ജൂൺ ഏഴിന്​ ചുമതലയേൽക്കും. ഓർഫനേജ് & അദർ പൂവർഹോംസ് ജില്ല പ്രസിഡന്റ്, ഡയറക്ടർ ഓഫ് അമല കിഡ്സ്, സെന്റ് ജോസഫ് പുവർ ഹോം& ലേഡീസ് ഹോസ്റ്റൽ ഡയറക്ടർ എന്നീ സ്ഥാനങ്ങൾ വഹിക്കുന്ന ഫാ.ബിജോയ് അറക്കൽ പുന്നപ്ര മാർ ഗ്രിഗോറിയോസ് ഇടവക വികാരിയായി ഏഴുവർഷം സേവനം അനുഷ്ഠിച്ചു. മാർ ഗ്രിഗോറിയോസ് കോളജിലെ ഓറിയൻറൽ ലാംഗ്വേജ് വിഭാഗത്തിന്റെ തലവനാണ്. ചമ്പക്കുളം അറക്കൽ പരേതനായ വി.തങ്കച്ചന്‍റെയും ആനിയമ്മയുടെയും മകനാണ്.