സ്വർണത്തിന് ഏകമുഖ വിൽപന നികുതി തുടരണം -എ.കെ.ജി.എസ്.എം.എ

ആലപ്പുഴ: ജി.എസ്.ടി നിയമത്തിൽ സംസ്ഥാന സർക്കാറിന് വിവേചന അധികാരം നൽകുന്ന സുപ്രീംകോടതി വിധി ഏകമുഖ വിൽപന നികുതി സമ്പ്രദായത്തെ അട്ടിമറിക്കുമെന്ന് ഓൾ കേരള ഗോൾഡ് ആൻഡ്​ സിൽവർ മർച്ചന്‍റ്​​സ്​ അസോസിയേഷൻ സംസ്ഥാന വർക്കിങ്​ പ്രസിഡന്‍റ്​ റോയി പലത്രയും സെക്രട്ടറി നസീർ പുന്നക്കലും പറഞ്ഞു. ജി.എസ്.ടി കൗൺസിലിൽ സ്വർണത്തിനും നികുതി വർധന വേണമെന്ന കേരളമുൾപ്പെടെയുള്ള സംസ്ഥാനങ്ങളുടെ ആവശ്യമാണ് വ്യാപാരികൾക്ക് ഭീഷണിയാകുന്നത്. നികുതി ഘടന സംസ്ഥാനങ്ങൾ പരിഷ്​കരിച്ചാൽ കുറഞ്ഞ നികുതി ഏർപ്പെടുത്തിയ സംസ്ഥാനങ്ങളിലേക്ക് വ്യാപാരം പോകുമെന്നും വ്യാപാര പ്രതിസന്ധി ഉണ്ടാകുമെന്നും അവർ പറഞ്ഞു. അസോസിയേഷൻ സംസ്ഥാന സമ്മേളനം ജൂലൈ മൂന്നിന് അങ്കമാലി അഡ്​ലക്​സ് കൺവെൻഷൻ സെന്‍ററിൽ മന്ത്രി കെ.എൻ. ബാലഗോപാൽ ഉദ്ഘാടനം ചെയ്യും. രണ്ട്​, മൂന്ന്​, നാല്​ തീയതികളിൽ സ്വർണം -ഡയമണ്ട് പ്ലാറ്റിനം -വെള്ളി ആഭരണങ്ങളുടെ ഏറ്റവും വലിയ എക്സിബിഷൻ കൺവെൻഷൻ സെന്‍ററിൽ നടക്കുമെന്ന് അവർ അറിയിച്ചു.