മഴയിൽ നാലുവീട്​ ഭാഗികമായി തകർന്നു

ആലപ്പുഴ: ചിലയിടങ്ങളിൽ ലഭിച്ച മഴക്കൊപ്പം ആഞ്ഞുവീശിയ കാറ്റിൽ മരംവീണ്​ ജില്ലയിൽ നാലു വീട്​ ഭാഗികമായി തകർന്നു. കലവൂർ, ആര്യാട്​ തെക്ക്​, പഴവീട്​, പത്തിയൂർ എന്നിവിടങ്ങളിലാണ്​ വീടുകൾക്ക്​ നാശം​. കലവൂർ ചിങ്ങംപറമ്പ്​ സുധ, ആര്യാട്​ ഷാജി നിവാസ്​ ഷാജികുമാർ, പഴവീട്​ തുളസീഭവനം സാബു, പത്തിയൂർ കുതിരശ്ശേരി രമേശ്​ എന്നിവരുടെ വീടാണ്​ തകർന്നത്​. കുട്ടനാട്​, അപ്പർ കുട്ടനാട്​ മേഖലയിൽ താഴ്ന്ന പ്രദേശങ്ങളിൽ പലയിടത്തും വെള്ളം കയറി. വെള്ളിയാഴ്ച മഴക്ക്​ നേരിയ ശമനമുണ്ടായിരുന്നെങ്കിലും വരുന്ന അഞ്ച്​ ദിവസം ശക്തമായ മഴയെന്നാണ്​​ കാലാവസ്ഥ നിരീക്ഷണ കേന്ദ്രം മുന്നറിയിപ്പ്. ജില്ലയിൽ ശനിയാഴ്ച 'യെല്ലോ' അലർട്ട്​ പ്രഖ്യാപിച്ചു​. ശക്തമായ കാറ്റിന്‍റെയും മോശം കാലാവസ്ഥയുടെയും പശ്ചാത്തലത്തില്‍ മത്സ്യത്തൊഴിലാളികൾക്ക്​ പ്രത്യേക ജാഗ്രതനിര്‍ദേശം പുറപ്പെടുവിച്ചു. ഇനിയൊരു അറിയിപ്പ്​ വരെ കടലിൽ പോകരുതെന്നാണ്​ നിർദേശം. ആറാട്ടുപുഴയിലും ഒറ്റമശ്ശേരിയിലും കടലേറ്റം ശക്തമാണ്. കുട്ടനാട്​, അപ്പർ കുട്ടനാട്​ മേഖലയിൽ നെൽകൃഷിക്കാണ്​ കൂടുതൽ നാശംനേരിട്ടത്​. വള്ളികുന്നം പുഞ്ചയിലെ വിളവെടുപ്പിന്​ പാകമായ 40 ഏക്കർ നെൽകൃഷിയും നശിച്ചു. ഭരണിക്കാവിൽ 22 ഏക്കറിലെ എള്ളുകൃഷിയും നശിച്ചു. ഇലിപ്പക്കുളം, മഞ്ഞാടിത്തറ, വെട്ടിക്കോട് ഭാഗങ്ങളിലെ പാടശേഖരങ്ങളിൽ നടത്തിയ എള്ളുകൃഷിയാണ്​ നശിച്ചത്. കിഴക്കൻ വെള്ളത്തിന്‍റെ വരവിൽ അച്ചൻകോവിലാർ, പമ്പ നദികളിൽ ജലനിരപ്പ്​ ഉയരുമെന്ന ആശങ്കയുണ്ട്​. ജലനിരപ്പ്​ ഉയർന്നാൽ നൂറനാട് പഞ്ചായത്തിലെ ആറ്റുവ, ചെറുമുഖ, ഇടപ്പോൺ വാർഡുകളിൽ വെള്ളംകയറും. കുട്ടനാട്ടിലെ വെള്ളപ്പൊക്കം ഒ​ഴിവാക്കാൻ തോട്ടപ്പള്ളി സ്പിൽവേയിലെ 38 ഷട്ടറും തണ്ണീർമുക്കം ബണ്ടിലെ 90 ഷട്ടറും​ നേരത്തേ തുറന്നതിനാൽ ജലം ഒഴുകിപ്പോകുന്നുണ്ട്​. മഴക്കണക്ക്​: ജില്ലയിൽ 16.48 മി.മീ. ആലപ്പുഴ: ജില്ലയിൽ വെള്ളിയാഴ്ച ശരാശരി ലഭിച്ചത്​ 16.48 മി.മീറ്റർ മഴ. ചേർത്തല-15.00, കാർത്തികപ്പള്ളി-14.2, മ​ങ്കൊമ്പ്​-12.00, മാവേലിക്കര-24.2, കായംകുളം-17.00 എന്നിങ്ങനെയാണ്​ മഴ ലഭിച്ചത്​​. കുട്ടനാട്ടിൽ ജലനിരപ്പ്​ ഉയർന്നു; അപകടനിലയിലേക്ക്​ എത്തിയില്ല ആലപ്പുഴ: സമീപ ജില്ലകളിലടക്കം കനത്തമഴയും നദികളിലെ ഒഴുക്കും ശക്തമായതോടെ കുട്ടനാട്ടിൽ ജലനിരപ്പുയർന്നു. പലയിടത്തും അപകടനിലയിൽ വെള്ള​മെത്തിയിട്ടില്ല. എന്നാൽ, നദികളിലെ മുന്നറിയിപ്പ്​ നില മറികടന്നാണ്​ വെള്ളമുയരുന്നത്​. പള്ളാത്തുരുത്തിയിൽ 1.05 മീറ്ററാണ്​ മുന്നറിയിപ്പ്​ നില. വെള്ളിയാഴ്ച രാവിലത്തെ കണക്കനുസരിച്ച്​ 1.08 മീറ്ററായി ഉയർന്നു. അപകടനില 1.40 മീറ്ററാണ്​. നെടുമുടിയിൽ മുന്നറിയിപ്പ്​ നില 1.10 ആണ്​. ഇവിടെ 1.24 മീറ്റർ ജലമുയർന്നു. അപകടനില 1.45 ആണ്​. രണ്ടിടത്തെയും ജലനിരപ്പ്​ അപകടനിലയിലേക്ക്​ എത്തിയിട്ടില്ല. തണ്ണീർമുക്കത്ത്​​ മുന്നറിയിപ്പ്​ നിലക്ക്​ അടുത്ത്​ ജലമുയർന്നിട്ടില്ല. കിഴക്കൻ​ വെള്ളത്തിന്‍റെ വരവിനൊപ്പം മഴ കനത്താൽ സ്ഥിതിമാറുമെന്ന ആശങ്കയുണ്ട്​.