പദ്ധതികൾ കടലാസിൽ: എ.സി കനാൽ 'ഒഴുകാതെ' തീരില്ല കുട്ടനാടിന്‍റെ പ്രളയഭീതി

ആലപ്പുഴ: പതിറ്റാണ്ടുകളായ ആസൂത്രണവും പദ്ധതികളും പാളിയതോടെ എ.സി കനാൽ നവീകരണം നടപ്പാകാത്ത സ്ഥിതി കുട്ടനാടിനെ ഓരോ മഴക്കാലത്തും ഭീതിയിൽ നിർത്തുന്നു.​ കാലാവസ്ഥവ്യതിയാനം കൂടിയായതോടെ കുറഞ്ഞ മാസങ്ങളാണ്​ കുട്ടനാട്ടുകാർക്ക്​ സമാധാനത്തോടെ കഴിയാനാകുന്നത്​. മുമ്പ്​ പ്രധാനമായും കാലവർഷത്തിലായിരുന്നു കുട്ടനാട്​ വെള്ളത്തിലായിരുന്നത്​. ഇപ്പോൾ വേനൽ മഴയിലും തുലാമഴയിലുമെല്ലാം വെള്ളക്കെട്ടിലാകുകയാണ്​. എ.സി കനാൽ ആഴംകൂട്ടൽ ശാസ്ത്രീയമായി നടക്കാത്തതാണ്​ മുഖ്യപ്രശ്നം. കുട്ടനാടിനൊപ്പം മുങ്ങുന്ന ആലപ്പുഴ-ചങ്ങനാശ്ശേരി റോഡ്​ (എ.സി റോഡ്) വെള്ളപ്പൊക്കത്തിന്​ മീതേ ഉയർന്നു നിൽക്കാൻ പദ്ധതിയാകുകയും പണി തുടങ്ങുകയും ചെയ്തത്​ ആശ്വാസമായിരിക്കെയാണ്​ എ.സി കനാൽ വെള്ളപ്പൊക്കത്തിന്‍റെ തീവ്രത കൂട്ടുന്ന നിലയിൽ ഇപ്പോഴുമുള്ളത്​. 70 വർഷം മുമ്പ്​ റോഡിനൊപ്പം നിർമിച്ചതാണ്​ കനാൽ. പഠനങ്ങളും പദ്ധതികളും തകൃതിയാണെങ്കിലും കുട്ടനാടിനെ വെള്ളപ്പൊക്കത്തിൽനിന്ന്​ രക്ഷിക്കേണ്ട കനാൽ അഴുക്കുചാലായി തളംകെട്ടി കിടക്കുന്നു. 1950കളിൽ കുട്ടനാടിന്റെ വികസനം ലക്ഷ്യമിട്ട്​ തയാറാക്കിയ സമഗ്ര രൂപരേഖയിലാണ് തോട്ടപ്പള്ളി സ്പിൽവേ, തണ്ണീർമുക്കം ബണ്ട്​, എ.സി റോഡ്, എ.സി കനാൽ എന്നിവ സ്ഥാനം പിടിച്ചത്​. 2018ലെ വെള്ളപ്പൊക്കത്തോടെ എ.സി റോഡ് നവീകരണത്തിന് ​നടപടിയായി. ആധുനിക രീതിയിൽ നിർമാണം നടക്കുകയാണിപ്പോൾ. ആഴം കുറഞ്ഞും കൈയേറ്റങ്ങളാൽ വീതി കുറഞ്ഞും കനാൽ കാര്യമായ പ്രയോജനം ചെയ്യാതെ ഏതാണ്ട്​ നിശ്ചലമാണ്​. ആഴവും വീതിയും കൂട്ടുന്നതിനെപ്പറ്റി കാലങ്ങളായി ചർച്ച നടക്കുന്നു. പമ്പയാറ്റിലൂടെയും മണിമലയാറ്റിലൂടെയും എത്തുന്ന വെള്ളം വേമ്പനാട്ട് കായലിലേക്ക് ഒഴുക്കുകയെന്ന എ.സി കനാലിന്റെ നിർമാണ ദൗത്യം. ഫലപ്രദമാകുന്നില്ലെന്നതാണ്​ പ്രശ്നം. എ.സി റോഡ് നിർമാണത്തിന് കര ഉയർത്താൻ മണ്ണെടുത്ത ഭാഗമാണ് കനാലായി രൂപപ്പെടുത്തിയത്​. 40 മീറ്റർ വീതിയാണ് ലക്ഷ്യമിട്ടത്. മിക്കവാറും ഇടങ്ങളിൽ വീതി തീരെ ചുരുങ്ങി. മൂന്നു ഘട്ടമായാണ് കനാൽ നവീകരണത്തിന്​ പദ്ധതിയിട്ടത്. ഇതിൽ മനക്കച്ചിറ-ഒന്നാംകര ഭാഗത്തെ പണി മാത്രമാണ്​ നടന്നത്​. ഇതും പൂർണമായില്ല. നെടുമുടി-പള്ളാത്തുരുത്തി, ഒന്നാംകര-നെടുമുടി ഭാഗങ്ങളുടെ പണി ഒന്നും നടന്നിട്ടില്ല. കനാൽ തുടങ്ങുന്നത്​ മനക്കച്ചിറയിൽ ആണെങ്കിലും മണിമലയാർ കനാലിൽ ചേരുന്നത് കിടങ്ങറയിൽനിന്നാണ്​. കനാലിന്‍റെ ആഴവും വീതിയും കൂട്ടിയാൽ വെളിയനാട്, കാവാലം, നീലംപേരൂർ, രാമങ്കരി തുടങ്ങിയ പ്രദേശങ്ങളിലെ വെള്ളപ്പൊക്കത്തിന്​ ശമനമുണ്ടാകും. കനാൽ നവീകരിക്കാൻ പഠനങ്ങൾ പലത്​ നടന്നെങ്കിലും ​ഒന്നുമുണ്ടായില്ല. 2007ൽ എം.എസ്. സ്വാമിനാഥൻ ഫൗണ്ടേഷനും 2019ൽ പ്ലാനിങ് ബോർഡും നടത്തിയ പഠനങ്ങളിൽ കനാൽ പദ്ധതി പൂർണതോതിലാക്കണമെന്ന് നിർദേശിച്ചിരുന്നു. ആഴവും വീതിയും കൂട്ടുമ്പോൾ​ വെള്ളം പുറത്തേക്ക് ഒഴുക്കുന്നതുപോലെ തിരികെ കയറാനുള്ള സാധ്യതയും​ ചിലർ ചൂണ്ടിക്കാട്ടുന്നത്​.