മക്കളെ കൊന്ന്​ യുവതിയുടെ ആത്മഹത്യ: പൊലീസുകാരനായ ഭർത്താവിന്‍റെ സ്ത്രീധനപീഡനമെന്ന്​ റിമാർഡ്​ റിപ്പോർട്ട്​

ആലപ്പുഴ: പൊലീസ്​ ക്വാർട്ടേഴ്സിൽ മക്കളെ കൊന്ന്​ യുവതി​ ജീവനൊടുക്കിയ സംഭവത്തിൽ പൊലീസുകാരനായ ഭർത്താവിന്‍റെ നിരന്തരമുള്ള സ്ത്രീധനപീഡനമെന്ന്​ റിമാൻഡ്​ റിപ്പോർട്ട്​. വണ്ടാനം മെഡിക്കൽ കോളജ്​ പൊലീസ്​ എയ്​ഡ്​പോസ്റ്റിലെ സിവിൽ പൊലീസ്​ ഓഫിസർ ആലപ്പുഴ സക്കറിയ വാർഡ് നവാസ് മൻസിലിൽ റെനീസിന്‍റെ (32) മാനസിക-ശാരീരിക പീഡനങ്ങളാണ്​ കൊലപാതകത്തിലേക്കും ആത്മഹത്യയിലേക്കും നയിച്ചതെന്നാണ്​ കണ്ടെത്തൽ. ആലപ്പുഴ മജിസ്ട്രേറ്റ് കോടതിയിൽ നൽകിയ റിമാൻഡ്​ റി​പ്പോർട്ടിലാണ്​ ഇക്കാര്യം വ്യക്തമാക്കുന്നത്​. ഈ മാസം 10നാണ്​ റെനീസിന്റെ ഭാര്യ നജ്​ല (27), മകൻ ടിപ്പു സുൽത്താൻ (അഞ്ച്​), മകൾ മലാല (ഒന്നേകാൽ) എന്നിവരെ ക്വാർട്ടേഴ്​സിൽ മരിച്ചനിലയിൽ കണ്ടെത്തിയത്. മക്കളെ കൊന്നശേഷം നജ്​​ല തൂങ്ങിമരിക്കുകയായിരുന്നു. റെനീസിന്‍റെ പീഡനമാണ് യുവതിയുടെ മരണത്തിന്​ കാരണമെന്ന്​ ബന്ധുക്കൾ ആരോപിച്ചിരുന്നു. 10 വർഷം മുമ്പ്​ നടന്ന വിവാഹത്തിന്​ സ്ത്രീധനമായി 40 പവനും 10 ലക്ഷം രൂപയും ബൈക്കും നൽകിയിരുന്നു. ഇതുകൂടാതെ കൂടുതൽ പണം ആവശ്യപ്പെട്ട്​ നജ്​ലയെ മാനസികമായി പീഡിപ്പിച്ചിരുന്നു. പണം ലഭിക്കുന്നതിന്​​ പലതവണ നജ്​ലയെ വീട്ടിലേക്ക് പറഞ്ഞയച്ചിരുന്നു. ഇതേതുടർന്ന്​ സ്ത്രീധനംകൂടാതെ പലപ്പോഴായി വൻതുകയും റെനീസിന്​ നൽകിയിരുന്നു. പുറത്തറിയാതിരിക്കാൻ ഫോൺ പോലും നൽകിയിരുന്നില്ല.​ ജോലിക്കായും അല്ലാതെയും പുറത്തുപോകുമ്പോൾ നജ്​ലയെ മുറിയില്‍ പൂട്ടിയിരുന്നു. മറ്റു സ്ത്രീകളുമായി റെനീസിന്​ അടുത്ത ബന്ധമുണ്ടായിരുന്നു. രാത്രി വൈകിയുള്ള റെനീസിന്റെ ഫോൺവിളികളെച്ചൊല്ലി തർക്കവും വഴക്കും പതിവായിരുന്നെന്നും റിമാൻഡ്​ റിപ്പോർട്ടിലുണ്ട്​. റിമാൻഡിലായ റെനീസിനെ കസ്റ്റഡിയിൽ വാങ്ങി ​ചോദ്യംചെയ്യാൻ തിങ്കളാഴ്ച കോടതിയിൽ അപേക്ഷ നൽകുമെന്നും പൊലീസ്​ പറഞ്ഞു.