'ഗസൽപൂക്കൾ' പ്രകാശനത്തിന്​ നാടൊന്നിക്കുന്നു

ആലപ്പുഴ: കനാൽ വാർഡ്​ ജനകീയ കൂട്ടായ്മയുടെ നേതൃത്വത്തിൽ കവയിത്രി സൈഗ ദിലീപിന്റെ 'ഗസൽപൂക്കൾ' കവിത സമാഹാരത്തിന്‍റെ പ്രസിദ്ധീകരണത്തിനും പ്രകാശനത്തിനും നാടൊന്നിക്കുന്നു. ആലപ്പുഴ ഐ.എം.എ ഹാളിൽ ഞായറാഴ്ച​ വൈകീട്ട്​ മൂന്നിന്​ മന്ത്രി സജി ചെറിയാൻ പ്രകാശനം നിർവഹിക്കും. ഗാനരചയിതാവ്​ ബീയാർ പ്രസാദ്​ ആദ്യപ്രതി ഏറ്റുവാങ്ങും. പി.പി. ചിത്തരഞ്ജൻ എം.എൽ.എ അധ്യക്ഷത വഹിക്കും. നഗരത്തിന്‍റെ ആദരം നഗരസഭ അധ്യക്ഷ സൗമ്യരാജ്​ നൽകും. സൈഗ ടീച്ചർ വിവിധ വിഭാഗങ്ങളിലായി ആയിരത്തോളം കവിതകൾ എഴുതിയിട്ടുണ്ട്. എന്നാൽ, സ്വന്തമായി പുസ്തകം പ്രസിദ്ധീകരിക്കാനുള്ള സാമ്പത്തികഭദ്രത ഇല്ലാത്തതിനാൽ ജനകീയ കൂട്ടായ്മ ഇത്​ ഏറ്റെടുക്കുകയായിരുന്നു. 'ഒരു വീട്ടിൽ ഒരു പുസ്തകം' ആശയവുമായി എല്ലാ വീട്ടിലും പുസ്തകമെത്തിക്കും. 165 രൂപ വിലയുള്ള പുസ്തകം 100 രൂപക്ക്​ നൽകി വിറ്റുകിട്ടുന്ന ഒരുലക്ഷം രൂപ ​സൈഗക്ക് നൽകും. വാർത്തസമ്മേളനത്തിൽ വിനോദ്​കുമാർ, അംജിത്ത്​, ഡോ. അസ്​ലം ഹബീബ്​, റഹിയാനത്ത്​, റോയി പി. തീയോച്ചൻ, അഡ്വ. ശെൽവരാജ്​,​ ജോയി ആന്‍റണി, ഹാരിസ്​ എന്നിവർ പ​ങ്കെടുത്തു. കെ.സി.ഇ.സി ജില്ല സമ്മേളനം ആലപ്പുഴ: കേരള കോഓപറേറ്റിവ് എംപ്ലോയീസ് കൗൺസിൽ (കെ.സി.ഇ.സി-എ.ഐ.ടി.യു.സി) ജില്ല സമ്മേളനം ആലപ്പുഴ ന്യൂ മോഡൽ കയർ സൊസൈറ്റിയുടെ പൈതൃക ഹാളിൽ ഞായറാഴ്ച നടക്കും. രാവിലെ 10.30ന്​ പ്രതിനിധി സമ്മേളനം സി.പി.ഐ ജില്ല സെക്രട്ടറി ടി.ജെ. ആ​ഞ്ചോലസ്​ ഉദ്​ഘാടനം ചെയ്യും. ഉച്ചക്ക്​ രണ്ടിന്​ യാത്രയയപ്പ് സമ്മേളനം എ.ഐ.ടി.യു.സി ജില്ല പ്രസിഡന്‍റ്​ അഡ്വ. വി. മോഹൻദാസ്​ ഉദ്​ഘാടനം ചെയ്യും. വാർത്തസമ്മേളനത്തിൽ സംസ്ഥാന ജനറൽ സെക്രട്ടറി വി.എം. അനിൽ, വൈസ് പ്രസിഡന്റ് ആർ. പ്രദീപ്, എ.ഐ.ടി.യു.സി ജില്ല സെക്രട്ടറി ഡി.പി. മധു, ഭുവനചന്ദ്രൻ, വി.എൻ. സുരേഷ്ബാബു എന്നിവർ പങ്കെടുത്തു.