മാറ്റിയിട്ടും മാറാതെ; ത്രിശങ്കുവിൽ എരമല്ലൂർ ബസ്​ സ്റ്റോപ്

അരൂർ: ത്രിശങ്കുവിലാണ്​ എരമല്ലൂർ ബസ്​ സ്റ്റോപ്. പുതുതായി നിശ്ചയിച്ചിടത്തും പഴയ സ്റ്റോപ്പിലും ബസുകൾ നിർത്തുന്നില്ലെന്നതാണ്​ ഇപ്പോഴത്തെ സ്ഥിതി. സ്റ്റോപ്പിൽ ബസുകൾ നിർത്താൻ പൊലീസ് സഹായം ലഭിച്ചില്ലെങ്കിൽ പഞ്ചായത്ത് അംഗങ്ങൾ ബസുകൾ തടയുമെന്ന് എഴുപുന്ന ഗ്രാമപഞ്ചായത്ത് പ്രസിഡന്‍റ്​. പുതിയ എരമല്ലൂർ ബസ്​ സ്റ്റോപ്പിൽ ബസുകൾ നിർത്താത്തത് യാത്രക്കാരെ വലക്കാൻ തുടങ്ങിയിട്ട് മാസങ്ങളായി. ബസുകളെ നിർത്തിക്കാൻ പൊലീസ് സഹായം ലഭിക്കുന്നില്ലെന്നാണ് പഞ്ചായത്ത് അധികൃതരുടെ പരാതി. തെക്കോട്ടു പോകുന്ന ബസുകൾക്ക് ദേശീയപാതയിൽ എരമല്ലൂരിൽ സ്റ്റോപ്പുണ്ടായിരുന്നത് എരമല്ലൂർ ജങ്​ഷന്‍റെ തെക്കുഭാഗത്തായിരുന്നു. സിഗ്നൽ ലൈറ്റിന്​ സമീപത്തു നിലനിൽക്കുന്ന ബസ്​ സ്റ്റോപ് അപകടസാധ്യതയുള്ളതാണെന്നും ദേശീയപാത അതോറിറ്റി നിർമിച്ച ബസ് ബേ വടക്കുഭാഗത്ത് പെട്രോൾ പമ്പിന് സമീപത്താണെന്നും ചൂണ്ടിക്കാട്ടി ബസ്​ സ്റ്റോപ് വടക്കോട്ട് മാറ്റണമെന്നാവശ്യപ്പെട്ട് എഴുപുന്ന ഗ്രാമപഞ്ചായത്ത് റീജ്യൻ ട്രാൻസ്പോർട്ട് അതോറിറ്റിക്ക്​ അപേക്ഷ നൽകിയിരുന്നു. കഴിഞ്ഞ വർഷം ഒക്ടോബറിൽ പുതിയ ബസ്​ സ്റ്റോപ് അനുവദിച്ച്​ തീരുമാനമായി. എന്നാൽ, ബസുകൾക്ക് സ്റ്റോപ്പിന്‍റെ കാര്യത്തിൽ വ്യക്തത വന്നില്ല. ചില ബസുകൾ രണ്ട് സ്റ്റോപ്പുകളിലും നിർത്തിയപ്പോൾ ചിലത്​ ഒരിടത്തും നിർത്താതായി. കലക്ടർ, ജില്ല പൊലീസ് മേധാവി, ഡെപ്യൂട്ടി ട്രാൻസ്പോർട്ട് കമീഷണർ എന്നിവരുടെ അറിവോടെ സ്റ്റോപ്പ്​ മാറ്റം തീരുമാനിച്ചിട്ടും പരിഹാരമില്ല. പുതിയ ബസ്​ സ്റ്റോപ്പിൽ കണ്ടെയ്നർ ലോറികളുടേത്​ ഉൾപ്പെടെ അനധികൃത പാർക്കിങ്​ ഒഴിവാക്കാനോ സ്റ്റോപ് വകവെക്കാതെ നീങ്ങുന്ന ബസുകളെ താക്കീത്​ ചെയ്യാനോ പൊലീസ് സേവനം ഇതുവരെ ബസ്​ സ്റ്റോപ്പിൽ ലഭ്യമായിട്ടില്ലെന്നാണ് പഞ്ചായത്ത് പ്രസിഡന്‍റ്​ ആർ. പ്രദീപ് പറയുന്നത്. സർക്കാർ ഉത്തരവ് നടപ്പാക്കാൻ പൊലീസ് ഇനിയും തയാറായില്ലെങ്കിൽ പഞ്ചായത്ത് അംഗങ്ങൾ റോഡിൽ ഇറങ്ങുമെന്ന് അദ്ദേഹം മുന്നറിയിപ്പ്​ നൽകി.