ഹോം ക്വാറൻറീൻ ലംഘനം; ചാത്തന്നൂർ സ്വദേശിക്കെതിരെ കേസെടുത്തു

കൊല്ലം: വിദേശരാജ്യങ്ങളിൽനിന്ന് എത്തുന്നവർ നിർബന്ധമായും ക്വാറൻറീനിൽ കഴിയണമെന്ന സർക്കാർ നിർദേശം ലംഘിച്ച യുവാവിനെതിരെ കേസെടുത്തു. ജൂലൈ രണ്ടിനു മസ്​കത്തിൽ നിന്ന് നാട്ടിലെത്തി വിദേശത്ത് നിന്നെത്തിയ മറ്റ് അഞ്ച് പേരോടൊപ്പം പാണിയിൽ ബി.എസ്​ ഭവനിൽ ഹോം ക്വാറൻറീനിൽ കഴിഞ്ഞ ചാത്തന്നൂർ ചിറക്കര ഉളിയനാട് പാണിയിൽ ആർ.എസ്​ ഭവനിൽ ശ്രീജിത് (32) ആണ് വിലക്ക്​ ലംഘിച്ച് പുറത്തിറങ്ങിയത്. ഇയാൾക്കെതിരെ ക്വാറൻറീൻ ലംഘനത്തിന് ചാത്തന്നൂർ പൊലീസ്​ കേസെടുത്തു. ആംബുലൻസിൽ മയ്യനാട്ടെ ഇൻസ്​റ്റിറ്റ്യൂഷനൽ ക്വാറൻറീൻ കേന്ദ്രത്തിൽ പ്രവേശിപ്പിച്ചു. നിർദേശം ലംഘിക്കുന്നവർക്കെതിരെ കർശനനടപടി തുടരുമെന്ന് സിറ്റി പൊലീസ്​ കമീഷണർ ടി. നാരായണൻ അറിയിച്ചു. മാസ്​ക് ധരിക്കാത്ത 416 പേർക്കെതിരെ​ നടപടി കൊല്ലം: സിറ്റിയിലെ പൊലീസ്​ സ്​റ്റേഷൻ പരിധികളിൽ ​േകാവിഡ് പ്രതിരോധ സുരക്ഷാക്രമീകരണങ്ങളുടെ ഭാഗമായി നടത്തിയ പരിശോധനയിൽ നിയമലംഘനത്തിന് 188 പേർക്കെതിരെ 144 കേസെടുത്തു. മാസ്​ക് ധരിക്കണമെന്ന നിർദേശം അവഗണിച്ച 416 പേർക്കെതിരെ കേരള എപ്പിഡെമിക് ഡിസീസസ്​ ഓർഡിനൻസ്​ പ്രകാരം നടപടി സ്വീകരിച്ചു. നിബന്ധന ലംഘിച്ചതിന് 62 വാഹനം പിടിച്ചെടുത്തു. സാമൂഹിക അകലം പാലിക്കാതെയും ശുചീകരണ സംവിധാനങ്ങൾ ഒരുക്കാതെയും വ്യാപാര സ്​ഥാപനങ്ങൾ പ്രവർത്തിപ്പിച്ചതിന് കൊല്ലം ഈസ്​റ്റ്, പള്ളിത്തോട്ടം, പരവൂർ, ഓച്ചിറ, ചവറ, കണ്ണനല്ലൂർ, പാരിപ്പള്ളി പൊലീസ്​ സ്​റ്റേഷൻ പരിധികളിലായി 15 വ്യാപാര സ്ഥാപന ഉടമകൾക്കെതിരെ കേസെടുത്തു.