യു.ഡി.എഫിലായിരിക്കെ ഏഴ്​ സീറ്റ്​, ഇപ്പോൾ മൂന്ന്​; സി.പി.എമ്മിനെതിരെ​ എൽ.ജെ.ഡി

ആലപ്പുഴ: എൽ.ഡി.എഫിൽ സീറ്റ്​ വിഭജനം ഏതാണ്ട്​ പൂർത്തിയായിരിക്കെ​ അർഹമായ പരിഗണന കിട്ടിയില്ലെന്ന പരാതിയുമായി ലോക്​താന്ത്രിക്​ ജനതാദൾ (എൽ.ജെ.ഡി)​ രംഗത്ത്​. കൂത്തുപറമ്പ്​, വടകര, കൽപ്പറ്റ എന്നീ മൂന്ന്​ സീറ്റ്​ മാത്രമാണ്​ പാർട്ടിക്ക്​ അനുവദിച്ചത്​. യു.ഡി.എഫിലായിരിക്കെ ഏഴ്​ സീറ്റിലാണ്​ മത്സരിച്ചത്​. പാർലമെൻറിലേക്കും തദ്ദേശ തെരഞ്ഞെടുപ്പിലും തഴയപ്പെട്ടപ്പോൾ നിയമസഭ തെരഞ്ഞെടുപ്പിൽ പരിഗണനയാണ്​ സി.പി.എം വാഗ്​ദാനം ചെയ്​തത്​. അതാണ്​ തെറ്റിച്ചിരിക്കുന്നത്​.

എൽ.ഡി.എഫിലെ മൂന്നാമത്തെയും മലബാറിൽ സി.പി.എം കഴിഞ്ഞാൽ മുന്നണിയിൽ വലിയ പാർട്ടിയും എൽ.ജെ.ഡിയാണ്​. എന്നാൽ, ഒൻപത്​ ജില്ലകളിൽ പാർട്ടിക്ക്​ പ്രാതിനിധ്യമുണ്ടാകില്ലെന്നതാണ്​ സീറ്റുവിഭജനം കഴിഞ്ഞപ്പോഴത്തെ സ്​ഥിതി. നടപടിയിൽ ശക്​തമായ പ്രതിഷേധമുണ്ടെന്ന്​ സംസ്​ഥാന ജന.സെക്രട്ടറി ഷേക്ക്​.പി ഹാരിസ്​ വാർത്ത സമ്മേളനത്തിൽ പറഞ്ഞു. ആലപ്പുഴ, തിരുവനന്തപുരം, തൃശൂർ ജില്ലകളിൽ ഒാരോ സീറ്റിന്​ കൂടിയാണ്​ പാർട്ടി ആവശ്യം ഉന്നയിച്ചിട്ടുള്ളത്​. ചിറ്റൂരിൽ മാത്രം പ്രസക്​തിയുള്ള ജെ.ഡി.എസിന്​ നാല്​ സീറ്റ്​ നൽകിയിരിക്കെയാണ്​ എൻ.സി.പിക്കും ഐ.എൻ.എല്ലിനുമൊപ്പം മാത്രം എണ്ണം സീറ്റ്​ തങ്ങൾക്കും അനുവദിച്ചത്​. പത്തിന്​ ചേരുന്ന സംസ്​ഥാന കമ്മിറ്റി നിലവിലെ സ്​ഥിതി വിലയിരുത്തും.

ആലപ്പുഴ ജില്ലയിലടക്കം സി.പി.എം മുതിർന്ന നേതാക്കളെ ഒഴിവാക്കിയത്​ മികച്ച തീരുമാനമാണെന്നും പുതുതലമുറക്ക്​ കടന്നുവരാൻ ഇത്​ അവസരമൊരുക്കുമെന്നും ഷേക്ക്​.പി ഹാരിസ്​ പ്രതികരിച്ചു.