18കാരനോടൊപ്പം കഴിയാൻ 19കാരിയായ കാമുകിക്ക്​ ഹൈകോടതി അനുമതി

കൊച്ചി: ആൺകുട്ടിക്കൊപ്പം 19കാരിയായ പെൺകുട്ടിക്ക്​ വിവാഹം കഴിക്കാതെ ഒന്നിച്ചുജീവിക്കാൻ ഹൈകോടതി അനുമതി. ആൺകുട്ടിക്ക് വിവാഹപ്രായമായില്ലെന്ന കാരണത്താൽ പിരിക്കാനാവില്ലെന്നും വിവാഹം കഴിക്കാതെ ഒരുമിച്ചുതാമസിക്കാൻ നിയമപരമായി തടസ്സമില്ലെന്നും ചൂണ്ടിക്കാട്ടിയാണ്​ ഡിവിഷൻ ബെഞ്ചി​​​െൻറ വിധി. 18കാരനായ കാമുക​​​െൻറ തടവിൽ കഴിയുന്ന മകളെ മോചിപ്പിക്കണമെന്നാവശ്യപ്പെട്ട് ആലപ്പുഴ സ്വദേശിയായ പിതാവ് നൽകിയ ഹരജിയാണ്​ തള്ളിയത്​.

യുവാവിന് പ്രായമാകു​േമ്പാൾ വിവാഹം നടത്താൻ തയാറാണെന്ന്​ പിതാവ്​ ഹേബിയസ് കോർപസ് ഹരജിയിൽ ചൂണ്ടിക്കാട്ടിയിരുന്നു. വിവാഹം കഴിക്കാതെ ഒന്നിച്ചുജീവിക്കൽ​ നിയമപരമല്ല. ദമ്പതികളെപോലെയാണ്​ ജീവിക്കുന്നത്​. കുഞ്ഞുങ്ങളുണ്ടായാൽ നിയമപരമായി അവകാശങ്ങളുണ്ടാവില്ല. ആണ്‍കുട്ടിക്ക് 21 വയസ്സാവാത്തതിനാല്‍ ശൈശവ വിവാഹ നിരോധന നിയമത്തി​​​െൻറ പരിധിയില്‍ വരുമെന്നും പിതാവ് വാദിച്ചു. ​

കോടതി നേര​േത്ത ഇരുവരുടെയും മൊഴി രേഖപ്പെടുത്തിയിരുന്നു. സ്‌കൂള്‍ കാലംമുതലേ പ്രണയത്തിലാണെന്നും ഒരുമിച്ചുജീവിക്കാനാണ്​ ആഗ്രഹിക്കുന്നതെന്നുമാണ്​ ഇരുവരും കോടതിയെ അറിയിച്ചത്. പെൺകുട്ടിയെ പിതാവിനൊപ്പം വിട്ട് ഇടക്കാല ഉത്തരവ് നൽകിയിരുന്നെങ്കിലും വീണ്ടും കാമുകനൊപ്പം പോയി. ആൺകുട്ടിക്ക് വിവാഹം കഴിക്കാനുള്ള നിയമപ്രകാരമുള്ള പ്രായമായിട്ടില്ലെങ്കിലും പെൺകുട്ടിക്ക് ആയിട്ടുണ്ടെന്ന്​ കോടതി ചൂണ്ടിക്കാട്ടി. ആ​രുടെ കൂടെ ജീവിക്കണമെന്ന്​ തീരുമാനിക്കാൻ പെൺകുട്ടിക്ക്​ ​നിയമപരമായ സ്വാതന്ത്ര്യമുണ്ട്​. അതിനാൽ വിവാഹം കഴിക്കാതെതന്നെ ആൺകുട്ടിക്കൊപ്പം താമസിക്കാമെന്ന് വ്യക്തമാക്കി.

നന്ദകുമാർ കേസിൽ ലിവ് ഇൻ റിലേഷൻഷിപ് സുപ്രീംകോടതി അംഗീകരിച്ചതാണ്​. പ്രായപൂർത്തിയായവർക്ക് ഇഷ്​ടമുള്ളവരോടൊപ്പം ജീവിക്കാനാവുമെന്നും കോടതിക്ക് സൂപ്പർ രക്ഷിതാവ് ചമയാനാവില്ലെന്നും ഹാദിയ കേസിലും പറഞ്ഞിട്ടുണ്ട്. മാതാവി​​​​െൻറ മനോവികാരമോ പിതാവി​​​െൻറ വേദ​നയോ പരിഗണിച്ച് കോടതി രക്ഷിതാവായി മാറരുതെന്നാണ്​ നിരീക്ഷണം. വിവാഹിതരാകാതെ ഒരുമിച്ച് കഴിയുന്നവർ സമൂഹത്തിലുണ്ടെന്ന സത്യത്തിനുനേരെ കോടതിക്ക് കണ്ണടക്കാൻ കഴിയില്ല. ഒരു ഹേബിയസ് ഹരജിയിലെ ഉത്തരവിലൂടെ ഇവരെ വേർപിരിക്കാനും സാധിക്കില്ല. ഗാര്‍ഹിക പീഡന സംരക്ഷണനിയമം ലിവ് ഇന്‍ റിലേഷനുകള്‍ക്കും ബാധകമാണെന്നത്​ ഇതിന് തെളിവായി കോടതി ചൂണ്ടിക്കാട്ടി.

സമൂഹത്തിലെ യാഥാസ്ഥിതിക വിഭാഗത്തിന് ഇത്തരം നടപടികൾ ഹിതകരമല്ലെങ്കിലും ഒരുമിച്ച് ജീവിക്കാനുള്ള അവകാശത്തെ മാനിക്കാൻ കോടതിക്ക്​ ഭരണഘടനാപരമായ ബാധ്യതയുണ്ട്. പെൺകുട്ടിക്ക് യുവാവിനൊപ്പം താമസിക്കാനും അയാൾക്ക് വിവാഹപ്രായം എത്തിയാൽ വിവാഹം കഴിക്കാനും സ്വാതന്ത്ര്യമുണ്ടെന്ന്​ കോടതി ചൂണ്ടിക്കാട്ടി.