മദ്യത്തിന്​ നികുതിയിളവ്​: നിർദേശം മന്ത്രിസഭ മാറ്റിവെച്ചു

തിരുവനന്തപുരം: സംസ്ഥാനത്ത്​ ഉൽപാദിപ്പിക്കുന്ന മദ്യത്തിന്​ വിറ്റുവരവ്​ നികുതി ഒഴിവാക്കണമെന്ന നിർദേശത്തിൽ തീരുമാനമെടുക്കാതെ മന്ത്രിസഭ. ഇക്കാര്യത്തിൽ വിശദ പരിശോധന നടത്തി റിപ്പോർട്ട്​ സമർപ്പിക്കാൻ ചീഫ്​ സെ​ക്രട്ടറിക്ക്​ നിർദേശം നൽകി.

സംസ്ഥാനത്ത്​ മദ്യത്തിന്‍റെ വിൽപന കുറഞ്ഞത്​ ഉൽപാദനത്തെ ബാധിച്ചിട്ടുണ്ട്​. പല സ്ഥാപനങ്ങളും ഉൽപാദനം നിർത്തുന്ന സാഹചര്യവുമുണ്ട്​. വ്യാജമദ്യം വർധിക്കുകയും ചെയ്യുന്നു. ഈ സാഹചര്യത്തിലാണ്​ നികുതിയിളവ്​ പരിഗണിച്ചത്​. ധനവകുപ്പും എക്​സൈസ്​ വകുപ്പും നൽകിയ നിർദേശങ്ങളിൽ ആശയക്കുഴപ്പമുണ്ടെന്നും മന്ത്രിസഭ വിലയിരുത്തി. തുടർന്നാണ്​ ചീഫ്​ സെക്രട്ടറിയോട്​ പരിശോധിക്കാൻ നിർദേശിച്ചത്​. അടുത്ത മന്ത്രിസഭ യോഗം വീണ്ടും പരിഗണിക്കും.