ലിനിയുടെ ഭര്‍ത്താവിന് ജോലി നല്‍കി സര്‍ക്കാര്‍ വാക്കുപാലിച്ചു

പേരാമ്പ്ര: നിപ ബാധിച്ചയാളെ പരിചരിക്കുന്നതിനിടെ അതേ രോഗം ബാധിച്ച്​ മരിച്ച പേരാ​മ്പ്ര താലൂക്ക്​ ആശുപത്രി താൽക്കാലിക നഴ്​്സ്​ ലിനിയുടെ ഭർത്താവ് പി. സജീഷിന് സർക്കാർ ജോലിക്കുള്ള ഉത്തരവിറങ്ങി. ആരോഗ്യ വകുപ്പ് ഡയറക്ടർക്കുവേണ്ടി സീനിയർ അഡ്മിനിസ്ട്രേറ്റിവ് ഓഫിസർ സി.എം. അജയ് മോഹനനാണ് ഉത്തരവ് പുറപ്പെടുവിച്ചത്. കോഴിക്കോട് ജില്ല മെഡിക്കൽ ഓഫിസറുടെ കീഴിൽ എൽ.ഡി ക്ലാർക്ക് തസ്തികയിൽ നിയമനം നൽകാനാണ്​ നിർദേശം. ഉദ്യോഗാർഥിയുടെ ബന്ധപ്പെട്ട രേഖകൾ പരിശോധിച്ച് ഉചിതമായ സ്ഥലത്ത് നിയമനം നൽകാനും ഈ വിവരം ഡയറക്ടറുടെ ഓഫിസിൽ അറിയിക്കാനും ഡി.എം.ഒയെ ചുമതലപ്പെടുത്തി.

മേയ് 21നാണ് ലിനി നിപ വൈറസ് ബാധയേറ്റ് മരിച്ചത്. ലിനിയുടെ രോഗമറിഞ്ഞ് ഭർത്താവ് വടകര പുത്തൂർ സ്വദേശി സജീഷ് ഗൾഫിൽനിന്ന്​ എത്തുകയായിരുന്നു. ഭാര്യ മരിച്ചതോടെ മക്കളായ ഋതുലിനെയും (അഞ്ച്​) സിദ്ധാർഥിനെയും (രണ്ട്​) തനിച്ചാക്കി വിദേശത്തേക്ക് പോകാൻ കഴിയാത്തതിനാൽ അവിടത്തെ ജോലി ഉപേക്ഷിച്ച് മക്കളോടൊപ്പം ലിനിയുടെ ചെമ്പനോടയിലെ പുതുശ്ശേരി വീട്ടിലാണ്​ താമസം. ലിനിയുടെ അമ്മ രാധയും സഹോദരി ലിബിയും സഹായത്തിനുണ്ട്​. സജീഷിന് ജോലിയും മക്കൾക്ക് 10 ലക്ഷം രൂപ വീതവും നൽകാൻ സർക്കാർ തീരുമാനിച്ചിരുന്നു.