വൈദ്യുതി വിച്ഛേദിക്കാനെത്തിയ ലൈന്മാനെ കുത്തിക്കൊന്ന കേസ്​: ജീവപര്യന്തം ശരിവെച്ചു

കൊച്ചി: ബിൽ അടക്കാതിരുന്നതിനെത്തുടർന്ന്​ വൈദ്യുതി വിച്ഛേദിക്കാനെത്തിയ ലൈന്മാനെ കുത്തിക്കൊലപ്പെടുത്തിയ കേസിലെ പ്രതിയുടെ ജീവപര്യന്തം ഹൈകോടതി ശരിവെച്ചു.

കെ.എസ്.ഇ.ബി കന്റോൺ​മെൻറ്​ സെക്ഷനിലെ ലൈന്മാൻ കുര്യാക്കോസിനെ കത്തിക്കൊന്ന കൊല്ലം പള്ളിക്കത്തോട്ടം യോഹന്നാന്​ കൊല്ലം അഡീ. സെഷൻസ്​ കോടതി വിധിച്ച ശിക്ഷയാണ്​ ജസ്റ്റിസ് പി.ബി. സുരേഷ് കുമാർ, ജസ്റ്റിസ് ജോബിൻ സെബാസ്​റ്റ്യൻ എന്നിവരടങ്ങുന്ന ഡിവിഷൻ ബെഞ്ച്​ ശരിവെച്ചത്​.

സാക്ഷിമൊഴികൾ അവിശ്വസിക്കേണ്ട സാഹചര്യമില്ലെന്നും പ്രതി കുറ്റകൃത്യം ചെയ്തെന്നത്​​ സംശയാതീതമായി തെളിയിക്കാൻ പ്രോസിക്യൂഷന് കഴിഞ്ഞിട്ടുണ്ടെന്നും വിലയിരുത്തിയാണ്​ ഉത്തരവ്​.

2008 ഏപ്രിൽ 26ന്​ കുര്യാ​ക്കോസ്​ പ്രതിയുടെ വീട്ടിലെത്തിയപ്പോഴായിരുന്നു സംഭവം. പ്രതിയുടെ സഹോദരിയുടെ വീട്ടിലെ വൈദ്യുതിബന്ധം വിച്ഛേദിച്ച ശേഷമാണ്​ ജീവനക്കാരൻ ഇയാളുടെ വീട്ടിലെത്തിയത്. വൈദ്യുതി ജീവനക്കാരുമായി ഇയാളുടെ മാതാവ് തർക്കിക്കുന്നതിനിടെ ശാരീരിക വെല്ലുവിളികൾ നേരിടുന്ന പ്രതി കുര്യാക്കോസിനെ കുത്തുകയായിരുന്നു.