മഴക്കെടുതിയിൽ മരിച്ചവർക്ക്​ ആദരാഞ്​ജലി അർപ്പിച്ച്​ നിയമസഭ; ദുരിതത്തിലായവരെ കൈവിടില്ലെന്ന്​ മുഖ്യമന്ത്രി

തിരുവനന്തപരും: സംസ്​ഥാനത്ത്​ അപ്രതീക്ഷിതമായുണ്ടായ മഴക്കെടുതിയിലും പ്രകൃതിക്ഷോഭത്തിലും മരണപ്പെട്ടവർക്ക്​ നിയമസഭ ആദരാഞ്​ജലി അർപ്പിച്ചു. മഴക്കെടുതിയിൽ ഒരാഴ്ചക്കിടെ 39 പേരാണ്​ മരിച്ചതെന്ന്​ മുഖ്യമന്ത്രി പിണറായി വിജയൻ നിയമസഭയിൽ പറഞ്ഞു. ആറുപേരെ കാണാതായി. അപകടത്തിൽപ്പെട്ടവരുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നു. ദുരിതത്തിലായവരെ സർക്കാർ കൈവിടില്ലെന്നും മുഖ്യമന്ത്രി വ്യക്തമാക്കി.

ഇരട്ട ന്യൂനമർദ്ദമാണ്​ അതിതീവ്ര മഴക്ക്​ കാരണമായത്​. മഴക്കെടുതി മൂലം ദുരിതത്തിലായ കുടുംബങ്ങളെ മാറ്റിത്താമസിപ്പിക്കാൻ 304 ക്യാമ്പുകൾ തുറന്നു. 3851 കുടുംബങ്ങൾ ഇവിടെയുണ്ട്​. ക്യാമ്പുകളിൽ മതിയായ സൗകര്യങ്ങൾ ഒരുക്കാൻ സർക്കാർ നിർദേശം നൽകി. 217 വീടുകൾക്ക്​ പൂർണമായും 1393 വീടുകൾ ഭാഗികമായും തകർന്നു.

ഏകോപിത പ്രവർത്തനമാണ്​ ദുരന്തനിവാരണ പ്രവർത്തനത്തിൽ നടന്നുവരുന്നത്​. റവന്യു, പൊലീസ്​, ഫയർഫോഴ്​സ്​, തദ്ദേശസ്വയംഭരണ വകുപ്പുകൾ എന്നിവ ചേർന്ന്​ ജനപങ്കാളിത്തത്തോടെ നേതൃപരമായ പ്രവർത്തനങ്ങൾ നടത്തുന്നു. ദേശീയ ദുരന്തനിവാരണ സേനയുടെ 11 ടീമുകളും സംസ്​ഥാനത്തുണ്ട്​. എയർഫോഴ്​സ്​, നേവി ഹെലികോപ്​റ്ററുകൾ സജ്ജമാണെന്നും മുഖ്യമന്ത്രി പറഞ്ഞു.

ദുരന്തനിവാരണ പ്രവർത്തനങ്ങൾക്ക്​ പ്രതിപക്ഷം എല്ലാ പിന്തുണയും നൽകുന്നതായി അറിയിച്ചു. അതേസമയം, മുന്നറിയിപ്പ്​ സംവിധാനങ്ങളിലുണ്ടായ പാളിച്ച പരിശോധിക്കണമെന്ന്​ കെ. ബാബു എം.എൽ.എ ആവശ്യപ്പെട്ടു.

നിയമസഭ ഇന്നത്തേക്ക്​ പിരിഞ്ഞു. തിങ്കളാഴ്ച സഭ വീണ്ടും ചേരും.