‘ലഹരി കേസിൽ ലീഗുകാരും’; മന്ത്രിയുടെ പരാമർശത്തിൽ കൊമ്പുകോർത്ത്​ പ്രതിപക്ഷം

തിരുവനന്തപുരം: ലഹരി കേസുകളിൽ മുസ്​ലിം ലീഗിൽ ഉൾപ്പെട്ടവർ പിടിയിലാകുന്നുവെന്ന വിധത്തിലെ കായികമന്ത്രി വി. അബ്​ദുറഹിമാ​ന്‍റെ പരാമർശത്തെചൊല്ലി നിയമസഭയിൽ പ്രതിപക്ഷ ബഹളം. ചോദ്യോത്തര വേളക്കൊടുവിലാണ്​ മന്ത്രിമാരും പ്രതിപക്ഷാംഗങ്ങളും കൊമ്പുകോർത്തത്​. എല്ലാ മണ്ഡലത്തിലും സ്​റ്റേഡിയം പണിയുമെന്നായിരുന്നു വാഗ്​ദാനമെന്നും ഈ ഇനത്തിൽ എത്ര രൂപ ചെലവഴിച്ചുവെന്നുമുള്ള ചോദ്യം ഉന്നയിക്കുന്നതിനിടെ, കായിക വകുപ്പ്​ വാഗ്ദാനവകുപ്പ്​ മാത്രമായി മാറിയെന്ന നജീബ്​ കാന്തപുരത്തിന്‍റെ പരാമർശമാണ്​ മന്ത്രിയെ പ്രകോപിതനാക്കിയത്​.

മന്ത്രിയുടെ വിവാദ പരാമർശത്തോടെ ​പ്രതിപക്ഷം ബഹളം തുടങ്ങി. പിന്നാലെ പ്രതിപക്ഷനേതാവ്​ ഇടപെട്ടു. ഒരു രാഷ്ട്രീയപ്രസ്ഥാനത്തെ മ​ന്ത്രി ആക്ഷേപിച്ചുവെന്നും അത് പിൻവലിക്കണമെന്നുമായിരുന്നു വി.ഡി. സതീശന്‍റെ ആവശ്യം. അല്ലാത്തപക്ഷം രേഖയിൽനിന്ന് നീക്കം ചെയ്യണമെന്നും സതീശൻ കൂട്ടിച്ചേർത്തു. പരിശോധിക്കാമെന്നായിരുന്നു സ്​പീക്കറുടെ മറുപടി. ‘എന്ത്​ പരിശോധിക്കാൻ’ എന്നായി സതീശൻ.

ചോദ്യകർത്താവും മന്ത്രിയെ അധിക്ഷേപിക്കുന്ന രീതിയിലാണ്​ സംസാരിച്ചതെന്നും ഇത്തരം കാര്യങ്ങളൊന്നും രേഖകളിൽ ഉണ്ടാകില്ലെന്നും സ്പീക്കർ വ്യക്​തമാക്കി. ഇതോടെയാണ്​ ബഹളത്തിന്​ ശമനമുണ്ടായത്​. എന്നാൽ ഉത്തരം മുട്ടുമ്പോൾ കൊഞ്ഞനം കുത്തുന്നത് ശരിയല്ലെന്നും താൻ ചോദിച്ച ചോദ്യത്തിന് ഒരു ഉത്തരവും കിട്ടിയിട്ടില്ലെന്നും ചൂണ്ടിക്കാട്ടി നജീബ്​ തന്‍റെ രണ്ടാം അവസരത്തിൽ വീണ്ടും എഴുന്നേറ്റു. ‘മന്ത്രിയോട് ചോദിച്ചത് എത്ര തുക ചെലവഴിച്ചു എന്നതാണ്.

അതിന്​ ലഹരി കേസുകളാണ്​ മറുപടിയെങ്കിൽ ഇങ്ങനെ​യെടുത്ത കേസുകളുടെ പാർട്ടി തിരിച്ചുള്ള കണക്ക്​ പറയണ’മെന്നും നജീബ്​ വ്യക്​തമാക്കി. പിന്നാലെ കായിക വകുപ്പ്​ പദ്ധതികൾ സംബന്ധിച്ച വിശദവവിവരങ്ങൾ മന്ത്രി അവതരിപ്പിച്ചു. അടുത്ത ചോദ്യത്തിനായി എഴുന്നേറ്റ ടി.വി. ഇബ്രാഹം ‘ലഹരി കേസിൽ ഉൾപ്പെട്ട ആലപ്പുഴയിലെ ബ്രാഞ്ച് സെക്രട്ടറി ഏത് പാർട്ടിക്കാരനാണെന്ന് പറഞ്ഞാൽ കൊള്ളാമെ’ന്ന്​ പറഞ്ഞതും ബഹളത്തിനിടയാക്കി.