ബി.ജെ.പിയിൽനിന്ന് തുളുശേരികവല വാർഡ് പിടിച്ചെടുത്ത് എൽ.ഡി.എഫ്

കോതമംഗലം: ഉപതെരഞ്ഞെടുപ്പ് നടന്ന നെല്ലിക്കുഴി ഗ്രാമപഞ്ചായത്ത് ആറാം വാർഡിൽ (തുളുശേരികവല) എൽ.ഡി.എഫ് സ്ഥാനാർഥിക്ക് മികച്ച വിജയം. എൽ.ഡി.എഫിലെ അരുൺ സി. ഗോവിന്ദ് 99 വോട്ടുകളുടെ ഭൂരിപക്ഷത്തിനാണ് വിജയിച്ചത്. ബി.ജെ.പിയുടെ സിറ്റിങ് സീറ്റാണ് പിടിച്ചെടുത്തത്.

ബി.ജെ.പി അംഗം സനൽ പുത്തൻപുരയ്ക്കൽ രാജി വെച്ചതിനെ തുടർന്നാണ് തെരഞ്ഞെടുപ്പ് നടന്നത്. ആകെ പോൾ ചെയ്ത 1398 വോട്ടിൽ എൽ.ഡി.എഫ് 640 വോട്ടുകൾ നേടി. ബി.ജെ.പിയിലെ ഉണ്ണികൃഷ്ണൻ മാങ്ങോട് 541 വോട്ടും കോൺഗ്രസിലെ വിജിത്ത് വിജയൻ 217 വോട്ടും നേടി. ഇതോടെ 21 അംഗ ഭരണസമിതിയിൽ എൽ.ഡി.എഫിന് 14ഉം യു.ഡി.എഫിന് അഞ്ചും ബി.ജെ.പിക്ക് രണ്ടും അംഗങ്ങളായി.