മണ്ണാർമല ചീനിക്കപ്പാറയിലെ ആദിവാസി കുടുംബങ്ങൾ മലയിറങ്ങിയില്ല

വെട്ടത്തൂർ:​ പെരിന്തൽമണ്ണ താലൂക്കിലെ മണ്ണാർമല ചീനിക്കപ്പാറ ​കോളനിയിലെ ആദിവാസികൾ മലയിറങ്ങിയില്ല. അപകട സാഹചര്യം നിലനിൽക്കുന്ന ഉൾവനത്തിലാണ്​ മൂന്ന്​ കുഞ്ഞുങ്ങളടക്കം 10 ആദിവാസികൾ താമസിക്കുന്നത്​. മലയുടെ മറുഭാഗത്തുള്ള പാണമ്പിയിലെ ഒമ്പത്​ ആദിവാസി കുടുംബങ്ങ​ൾ സുരക്ഷിത സ്​ഥലത്തേക്ക്​ മാറിയിട്ടും ഇവർ ഉൾവനത്തിൽതന്നെ കഴിയുകയാണ്​.

കഴിഞ്ഞവർഷം പത്തോളം സ്​ഥലങ്ങളിൽ വലുതും ചെറുതുമായ ഉരുൾപൊട്ടലുണ്ടായ മലയിലാണ്​ ഇവർ താമസിക്കുന്നത്​. ജിയോളജി വകുപ്പ്​ കഴിഞ്ഞവർഷം അപകടമേഖലയായി റിപ്പോർട്ട്​ ചെയ്​ത മല​യാണിത്​. ​അതേസമയം, അപകടസാഹചര്യം നിലനിൽക്കുന്നതിനാൽ നിർബന്ധമായും സുരക്ഷിത സ്​ഥലങ്ങളിലേക്ക്​ മാറിത്താമസിക്കാൻ വില്ലേജ്​ അധികൃതർ ആവശ്യപ്പെട്ടിട്ടുണ്ട്​. വില്ലേജ്​, ഗ്രാമ പഞ്ചായത്ത്​ അധികൃതർ പ്രദേശങ്ങൾ സന്ദർശിച്ച്​ കുടുംബങ്ങൾക്ക്​ കഴിഞ്ഞ ദിവസം മുന്നറിയിപ്പ്​ നൽകിയിരുന്നു.