ദുരന്തനിവാരണ സേന വൈകി എത്തിയത്​ അക്ഷന്തവ്യമായ തെറ്റ്​ - ചെന്നിത്തല

കട്ടിപ്പാറ: ഉരുൾ പൊട്ടൽ ദുരന്തം വിതച്ച കരിഞ്ചോലക്കായി പ്രത്യേക പാക്കേജ്​​ പ്രഖ്യാപിക്കണമെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. ദുരിത ബാധിതരെ പുനഃരധിവസിപ്പിക്കാൻ വേണ്ട നടപടികൾ നടപ്പിലാക്കണമെന്നും ദുരന്ത ബാധിത സ്​ഥലം സന്ദർശിച്ച്​ ചെന്നിത്തല പറഞ്ഞു. 

ആറു വീടുകൾ തകരുകയും ഏഴുപേരെ പ്രകൃതി ക്ഷോഭത്തിൽ കാണാതാവുകയും ചെയ്​തിരിക്കുന്നു.ഇന്നലെ ദുരന്ത നിവാരണ സേന പ്രദേശത്ത്​ എത്തിയത്​ വളരെ വൈകിയാണ്​. പുലർച്ചെ നടന്ന സംഭവത്തിന്​ രക്ഷാ പ്രവർത്തനത്തിനായി ദുരന്തനിവാരണ സേന എത്തുന്നത്​ വൈകീട്ടാണ്​. ഇത്​ അക്ഷന്തവ്യമായ തെറ്റാണ്​. മലബാർ മേഖലയുടെ പ്രത്യേക സാഹചര്യം കണക്കിലെടുത്ത്​ കോഴിക്കോട്​ ദുരന്തനിവാരണ സേനയുടെ ഒരു യൂണിറ്റ്​ ആവശ്യമാണെന്നും ചെന്നിത്തല പറഞ്ഞു. 

മരിച്ചവരുടെ ബന്ധുക്കൾക്ക്​ അടിയന്തര സഹായം നൽകണം. സർക്കാറി​​​െൻറ അനുമതിയില്ലാതെ ഇൗ പ്രദേശത്ത്​ നാലുലക്ഷം ലിറ്റർ വെള്ളം സംരക്ഷിക്കുന്ന ജലസംഭരണി നിർമിച്ചത്​ ​ഗൗരവം അർഹിക്കുന്ന വിഷയമാണ്​. ഇത്​ മനുഷ്യനിർമിത ദുരന്തമാണ്​. ഇൗ ജലസംഭരണിയാണ്​ ദുരന്തത്തി​​​െൻറ ആഘാതം വർധിപ്പിച്ചത്​. ഇത്​ നിർമിച്ചത്​ ആരാണെന്ന്​ കണ്ടെത്തി അവർക്കെതിരെയും ഇൗ ജലസംഭരണി നിർമിക്കുന്നതിന്​ സഹായിച്ച ഉദ്യോഗസ്​ഥർക്കെതിരെയും ശക്​തമായ നടപടി ഉണ്ടാകണമെന്നും ചെന്നിത്തല പറഞ്ഞു. 

ചെന്നിത്തലക്കൊപ്പം എം.കെ രാഘവൻ എം.പിയും ​എം.​െഎ ഷാനവാസ്​ എം.പിയും സ്​ഥലം സന്ദർശിച്ചു.