ലദീദ: ജാമിഅ സമരഭൂമിയിൽ കണ്ണൂരി​ന്‍റെ കനൽ

കണ്ണൂർ: ഡൽഹി ജാമിഅ മില്ലിയ സർവകലാശാലയിലെ പൊലീസ്​ അതിക്രമത്തിന്​ പിന്നാലെ, പൗരത്വബില്ലിനെതിരായ വിദ്യാർഥി രോഷം ആളിപ്പടരു​േമ്പാൾ അതിലൊരു കനൽ കണ്ണൂർ സിറ്റിയിൽ നിന്നാണ്​. ഡൽഹി ജാമിഅ കാമ്പസിൽ വിദ്യാർഥികളെ പൊലീസ്​ വളഞ്ഞിട്ട്​ തല്ലിയപ്പോൾ ലാത്തിയെ ഭയക്കാതെ സഹപാഠിക്ക്​ ചുറ്റുംനിന്ന്​ ​പ്രതിരോധം തീർത്ത പെൺകുട്ടികളിലൊരാൾ കണ്ണൂർ സിറ്റി ചിറക്കൽകുളം ഫിർദൗസിൽ സഖ്​ലൂനി​ന്‍റെ മകൾ ലദീദയാണ്​. ജാമിഅയിൽ ഒന്നാം വർഷ അറബിക്​ ബിരുദ വിദ്യാർഥിനിയാണ്​ ലദീദ.

ലദീദയുടെയും കൂട്ടുകാരുടെയുടെയും നേർക്കുണ്ടായ പൊലീസ്​ നടപടിയുടെ വീഡിയോ സമൂഹിക മാധ്യമങ്ങളിൽ വൈറലായപ്പോൾ സഖ്​ലൂൻ മകൾക്ക്​ അയച്ച വാട്​സ്​ ആപ്​ സന്ദേശം ഇതാണ്​. ‘‘ലദീദാ... നീ എനിക്ക്​ അഭിമാനം... ഈ ത്യാഗം വെറുതെയാകില്ല...’’ പിതാവിന്‍റെ പിന്തുണയുടെ സ്​ക്രീൻ ഷോട്ട്​ ഫേസ്​ബുക്കിൽ പങ്കുവെച്ച ചെയ്​ത മകൾ കുറിച്ചത്​ ഇങ്ങനെ: ‘‘ഇത​ുപോലുള്ള മാതാപിതാക്കളും ഇണയും അവരുടെ പ്രാർത്ഥനയും കൂടെ ഉള്ളിടത്തോളം എന്തിന്​ ഭയക്കണം...’’
പിതാവ്​ മാത്രമല്ല, ഭർത്താവ്​ തിരുവനന്തപുരം പെരുമാതുറ സ്വദേശി ഷിയാസും ലദീദക്ക്​ പിന്തുണയുമായി രംഗത്തുണ്ട്​.

മകളുടെയും ഉപ്പയുടെയും​ പോരാട്ട വീര്യത്തിന്​ സാമൂഹിക മാധ്യമങ്ങളിൽ നിറഞ്ഞ ​ൈകയടിയാണ്​. തന്നെയും കൂടെയുള്ള പലരെയും പൊലീസ്​ ക്രൂരമായി മർദ്ദിച്ചുവെന്നും പൊലീസ്​ പിന്നാലെയുണ്ടെന്നും ലദീദ പറഞ്ഞു. പൗരത്വബില്ലിനെതിരായ പ്രക്ഷോഭം ന്യായമാണെന്നും മകൾ അതി​​​​​​​​െൻറ മുൻനിരയിൽ കാണുന്നതിൽ അഭിമാനിക്കുന്നുവെന്ന്​ സഖ്​ലൂൻ പറഞ്ഞു. സുരക്ഷയിൽ ആശങ്കയുണ്ട്​. എങ്കിലും സമരമുഖത്ത്​ നിന്ന്​ ഓടിപ്പോരാൻ മകളോട്​ പറഞ്ഞിട്ടില്ല, പറയുകയുമില്ല. വരുന്നത്​ അപ്പോൾ നോക്കാമെന്നും പിതാവ്​ തുടർന്നു.

കണ്ണൂർ ഡി.ഐ.എസിൽ പ്ലസ്​ ടു പൂർത്തിയാക്കിയ ലദീദ തളിപ്പറമ്പ്​ സർ സയ്യിദ്​ കോളജിൽ നിന്ന്​ എകണോമിക്​സിൽ ബിരുദം നേടിയാണ്​ രണ്ടാം ബിരുദ കോഴ്​സിന്​ ഈ വർഷം ഡൽഹി ജാമിഅയിൽ ചേർന്നത്​.