കുറ്റിപ്പുറത്ത് സ്കൂട്ടർ യാത്രികരെ ഇടിച്ചുതെറിപ്പിച്ച് കാർ; നടുക്കുന്ന ദൃശ്യങ്ങൾ

കുറ്റിപ്പുറം: കാറും സ്കൂട്ടറും കൂട്ടിയിടിച്ച് പ്രവാസി മരിച്ചു. പുത്തനത്താണി കരിങ്കപ്പാറ സ്വദേശി അബ്ദുൾ ഖാദർ (49) ആണ് മരിച്ചത്. ശനിയാഴ്ച്ച വൈകുന്നേരം അഞ്ചരക്ക് കുറ്റിപ്പുറം - തിരൂർ റോഡിൽ മഞ്ചാടിയിൽ വെച്ചാണ് അപകടം.

കുറ്റിപ്പുറം ഭാഗത്തേക്ക് പോകുകയായിരുന്ന ഇന്നോവ കാര്‍ മറ്റൊരു വാഹനത്തെ മറികടക്കുന്നതിനിടെ സ്കുട്ടറിനെ തെറിപ്പിച്ച ശേഷം സമീപത്തെ കടയുടെ മതിലിൽ ഇടിച്ചാണ് നിന്നത്. സ്കൂട്ടർ യാത്രികർ തവനൂർ മദിരശേരിയിലുള്ള ബന്ധുവിനെ കണ്ട് മടങ്ങുന്ന വഴിയാണ് അപകടം.

യു.എ.ഇ അൽ ഐനിൽ ജോലി ചെയ്യുന്ന അബ്ദുൽ ഖാദർ ദിവസങ്ങൾക്ക് മുൻപാണ് നാട്ടിലെത്തിയത്. കുടെ യാത്ര ചെയ്ത ഭാര്യ റുഖിയ പരിക്കേറ്റ് കോട്ടക്കൽ സ്വകാര്യ ആശുപത്രിയിൽ ചികിത്സയിലാണ്.

അബ്ദുൽ ഖാദറിന്റെ മൃതദേഹം തിരൂര്‍ ജില്ല ആശുപത്രിയില്‍ പോസ്റ്റ്മോര്‍ട്ടം നടത്തി കരിങ്കപ്പാറ ജുമാമസ്ജിദ് ഖബര്‍സ്ഥാനില്‍ ഖബറടക്കും. മക്കള്‍: ഫാത്തിമ ജുമൈലത്ത്, മുഹമ്മദ് ജിനാന്‍.