കരിപ്പൂര്‍ ഹജ്ജ് ഹൗസില്‍ മദ്‌റസ അധ്യാപകര്‍ക്ക് സ്ഥിര പരിശീലന കേന്ദ്രം ആരംഭിക്കും - മന്ത്രി ജലീല്‍

കോഴിക്കോട്: മദ്‌റസ അധ്യാപകര്‍ക്ക് സ്​ഥിര പരിശീലനത്തിനുള്ള സൗകര്യം കരിപ്പൂര്‍ ഹജ്ജ് ഹൗസില്‍ ഒരുക്കുമെന്ന് മന്ത്രി ഡോ.കെ.ടി. ജലീല്‍. കോഴിക്കോട് മദ്‌റസാധ്യാപക ക്ഷേമനിധി ബോര്‍ഡ് സംഘടിപ്പിച്ച പരിശീലന ക്യാമ്പ്​ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ജനറല്‍ വിഭാഗം, സൈക്കോളജി, പുതിയ സാ​ങ്കേതിക വിദ്യകൾ തുടങ്ങിയ പ്രധാന വിഷയങ്ങളിലുള്ള പ്രത്യേക പരിശീലനമാണ് കേന്ദ്രത്തില്‍ നല്‍കുക.

ഹജ്ജ്​ ഹൗസിൽ ഒരാഴ്​ച താമസിച്ച്​ പരിശീലനം നേടാനുള്ള സൗകര്യമാണ്​ ഒരുക്കുക. ഹജ്ജുമായി ബന്ധപ്പെട്ട മൂന്നുമാസമൊഴികെ ഓരോ ആഴ്​ച വീതം സംസ്​ഥാനത്തെ മുഴുവൻ മദ്​റസ അധ്യാപകർക്കും പരിശീലനം നൽകാനാകു​ം. ഇതിനായുള്ള ആലോചനകള്‍ നടന്നുകൊണ്ടിരിക്കുകയാണ്. അധ്യാപകരെ സംബന്ധിച്ചിടത്തോളം നിരന്തര പരിശീലനം ആവശ്യമാണെന്നും മന്ത്രി കൂട്ടിച്ചേര്‍ത്തു.

മദ്‌റസാധ്യാപക ക്ഷേമനിധിക്ക്​ മറ്റു ക്ഷേമനിധികള്‍ക്ക് നല്‍കുന്ന അതേ പരിഗണനയാണ് സര്‍ക്കാര്‍ നല്‍കുന്നത്. സര്‍ക്കാര്‍ അനുവദിച്ച ഫണ്ട് ബാങ്കില്‍ നിക്ഷേപിച്ചാണ് മറ്റു ക്ഷേമനിധികൾ വരുമാനം നേടുന്നത്. എന്നാല്‍, പലിശ പ്രശ്‌നം നേരിടുന്നതിനാല്‍ മദ്‌റസാധ്യാപക ക്ഷേമനിധി ഫണ്ട് ട്രഷറിയിലാണ്​ നിക്ഷേപിച്ചത്​. ഈ തുക സർക്കാറിന്​ അടിയന്തര ആവശ്യങ്ങൾക്ക്​ ഉപയോഗിക്കാനാകും. അതിന്​ സര്‍ക്കാര്‍ നല്‍കുന്ന ഇന്‍സൻറീവ് മാത്രമാണ് ബോര്‍ഡി​‍െൻറ വരുമാനം. മറ്റു രീതിയിലുള്ള ഫണ്ട് അനുവദിക്കുന്നുവെന്ന തരത്തിലുള്ള ആരോപണങ്ങള്‍ ശരിയല്ലെന്നും കെ.ടി. ജലീല്‍ പറഞ്ഞു.