കെ.എസ്.യു സംസ്ഥാന പ്രസിഡൻറ്​ രമേശ് ചെന്നിത്തലയെ  കണ്ടില്ലെന്ന പ്രചാരണം അടിസ്ഥാനരഹിതം -എൻ.എസ്​.യു

തിരുവനന്തപുരം: കെ.എസ്.യു സംസ്ഥാന പ്രസിഡൻറ്​ കെ.എം. അഭിജിത് ജില്ല ജയിലില്‍ പ്രതിപക്ഷനേതാവ് രമേശ് ചെന്നിത്തലയെ കാണാന്‍ വിമുഖത കാട്ടിയെന്ന പ്രചാരണം അടിസ്ഥാനരഹിതമാണെന്ന് എന്‍.എസ്.യു ദേശീയസമിതി അംഗം ജെ.എസ്. അഖില്‍ പ്രസ്താവനയിൽ അറിയിച്ചു. സ്വാശ്രയ ഫീസ് വര്‍ധനക്കെതിരെ ആരോഗ്യമന്ത്രിയുടെ വസതിയിലേക്ക് നടത്തിയ മാര്‍ച്ചിനിടെ പൊലീസ് അറസ്​റ്റ്​ചെയ്ത് റിമാന്‍ഡ് ചെയ്ത കെ.എം. അഭിജിത്തുമായി ജൂലൈ ആറിന്​ പ്രതിപക്ഷനേതാവ് രമേശ് ചെന്നിത്തല കൂടിക്കാഴ്ച നടത്തിയിരുന്നു.

തുടര്‍സമരത്തി​​​െൻറ ഭാഗമായി ഏഴിന്​ മുഖ്യമന്ത്രിയുടെ വസതിയിലേക്ക് മാര്‍ച്ച് നടത്തുകയും കൂടുതല്‍ കെ.എസ്.യു പ്രവര്‍ത്തകർ ജയിലിൽ അടക്കപ്പെടുകയും ചെയ്തു. ഇവർ ഉൾപ്പെടെ രണ്ടു ദിവസങ്ങളായി അറസ്​റ്റിലായ കെ.എസ്.യു പ്രവര്‍ത്തകരെ ഒരുമിച്ച് കാണാനുള്ള ആഗ്രഹം പ്രതിപക്ഷനേതാവ് പ്രകടിപ്പിച്ചതിനെ തുടര്‍ന്ന് ജയില്‍ അധികൃതര്‍ വെള്ളിയാഴ്​ച അതിന് സൗകര്യം ഒരുക്കി. എന്നാല്‍, ഈസമയം ശുചിമുറിയില്‍ ആയിരുന്ന അഭിജിത്തിന് സംഘത്തോടൊപ്പം പ്രതിപക്ഷനേതാവിനെ കാണാന്‍ കഴിഞ്ഞില്ല. ശുചിമുറിയില്‍നിന്ന്​ പുറത്തുവന്നയുടൻ അഭിജിത്​ പ്രതിപക്ഷനേതാവിനെ കാണാന്‍ സന്ദര്‍ശകമുറിയിൽ എത്തി. വസ്തുത ഇതായിരിക്കെ കടകവിരുദ്ധമായ കഥകളാണ് പ്രചരിപ്പിക്കാന്‍ ചിലര്‍ ശ്രമിച്ചതെന്നും അഖില്‍ പറഞ്ഞു.