കെ.എസ്​.ആർ.ടി.സി: സ്​കൂളുകൾക്കായി സ്​റ്റുഡൻറ്​ ബോണ്ട്​ സർവിസ്

തിരുവനന്തപുരം: വിദ്യാർഥികളെ സ്​കൂളുകളിലെത്തിക്കാൻ കെ.എസ്​.ആർ.ടി.സി സ്​റ്റുഡൻറ്​​ ബോണ്ട് സർവിസ്​ ആരംഭിക്കാൻ തീരുമാനിച്ചു. വിദ്യാഭ്യാസമ​ന്ത്രി വി. ശിവൻകുട്ടിയും ഗതാഗതമന്ത്രി ആൻറണി രാജുവും തമ്മിൽ നടന്ന ചർച്ചയിലാണ്​ തീരുമാനം​. ബോണ്ട്​ സർവിസ്​ ആവശ്യമുള്ള സ്‌കൂളുകള്‍ അതത് കെ.എസ്.ആര്‍.ടി.സി ഡിപ്പോയുമായി ബന്ധപ്പെടണം.

സ്‌കൂളുകളുമായി ചര്‍ച്ച ചെയ്ത് നിരക്ക് തീരുമാനിക്കും. മറ്റ്​ വാഹനങ്ങളുടെ നിരക്കിനെക്കാൾ കുറവായിരിക്കും ബോണ്ട്​ സർവിസുകൾക്കെന്ന്​ മന്ത്രി ആൻറണി രാജു വ്യക്തമാക്കി. ദൂരത്തിനനുസരിച്ചാകും നിരക്കുകൾ തീരുമാനിക്കുക.

ഗതാഗത വകുപ്പ് തയാറാക്കിയ യാത്രാ പ്രോട്ടോകോള്‍ നിര്‍ദേശങ്ങള്‍ വിദ്യാഭ്യാസ വകുപ്പ് സ്​കൂളുകൾക്ക്​ കൈമാറും. നിലവിലെ വിദ്യാർഥി കണ്‍സെഷന്‍ അതേപടി തുടരും. ഒക്ടോബര്‍ 20ന് മുമ്പ് മോട്ടോർ വാഹനവകുപ്പ് ഉദ്യോഗസ്ഥര്‍ സ്‌കൂളുകളിലെത്തി ബസുകളുടെ ക്ഷമത പരിശോധിച്ച്​ ട്രാവൽ പ്രോ​േട്ടാകോൾ അനുസരിച്ച ഫിറ്റ്‌നസ് സർട്ടിഫിക്കറ്റുകൾ നൽകും. വിദ്യാഭ്യാസ സ്ഥാപനങ്ങളുടെ വാഹനങ്ങള്‍ക്ക് 2020 ഒക്ടോബര്‍ മുതല്‍ 2021 സെപ്​റ്റംബര്‍ വരെയുള്ള റോഡ് നികുതി ഒഴിവാക്കണമെന്ന് സര്‍ക്കാറിനോട് ഗതാഗതവകുപ്പ് ആവശ്യപ്പെടും. ബോണ്ട്​ സർവിസിൽ കൺസഷൻ നിരക്കിൽ കുട്ടികളെ കൊണ്ടുപോകാനാകില്ലെന്നും ചോദ്യങ്ങൾക്ക്​ മറുപടിയായി മ​​ന്ത്രി പറഞ്ഞു.