കെ. ഇ.ആർ ചട്ടം ഭേദഗതി ചെയ്യാതെ കെ.എസ്.ആർ.ടി.സി ലോ ഫ്ലോർ ബസുകൾ സ്കൂൾ ക്ലാസ് മുറികളാക്കാൻ കഴിയില്ല

കോഴിക്കോട്: ഏറെ ശ്രദ്ധപിടിച്ചുപറ്റിയ കെ.എസ്.ആർ.ടി.സി ലോ ഫ്ലോർ ബസുകൾ സ്കൂൾ ക്ലാസ് മുറികളാക്കാനുള്ള തീരുമാനത്തിനു സാ​ങ്കേതിക തടസങ്ങളേറെ. കെ.ഇ.ആർ ചട്ടങ്ങള്‍ക്കാണ് വിരുദ്ധമാണ് പുതിയ തീരുമാനം. മേൽ കൂരയായി അസ്ബറ്റോസ് ഷീറ്റുകൾ പോലും പാടില്ലെന്നാണ് വിദ്യാഭ്യാസ വകുപ്പ് പുതുതായി ഇറക്കിയ ഉത്തരവ്. ഈ സാഹചര്യത്തിൽ ബസിനുള്ളിൽ ക്ലാസ് മുറികൾ ഒരുക്കാൻ ചട്ടം അനുവദിക്കുന്നില്ല.

കെ.ഇ.ആർ ചട്ട പ്രകാരം എൽ.പി സ്കൂളുകൾ 20 അടി വീതിയും 18 നീളവും 10 അടി ഉയരവും വേണം. യു.പി, ഹൈസ്കൂൾ ക്ലാസുകൾക്ക് 20 അടി നീളവും , 20 അടി വീതിയും 13 അടി നീളവും വേണം. ഈ മാനദണ്ഡങ്ങൾ പ്രകാരം ബസിൽ ക്ലാസ് ഒരുക്കൽ അസാധ്യമാണ്.

ഈ മാസം ഏഴാം തിയതി പൊതു വിദ്യാഭ്യാസ അഡീഷണൽ ഡയറക്ടർ ഇറക്കിയ ഉത്തരവിൽ അസ്ബറ്റോസ് ഷീറ്റ് മേൽക്കൂര മാറ്റണമെന്ന് പ്രത്യേകം പറയുന്നു. ഈ വേളയിലാണ് ഗതാഗത മന്ത്രിയുടെ പ്രസ്താവന വിമർശത്തിനിടയാക്കുന്നത്.

കെ. ഇ.ആർ ചട്ടം ഭേദഗതി ചെയുകയോ പ്രത്യേക ഉത്തരവിറക്കുകയോ ചെയ്താൽ മാത്രമെ ബസിലെ ക്ലാസ് മുറികൾ യാഥാർഥ്യമാകൂ.