കെ.എസ്​.ആർ.ടി.സി ലോഫ്ലോർ ബസുകൾ ക്ലാസ്​ മുറികളാകുന്നു

തിരുവനന്തപുരം: കെ.എസ്​.ആർ.ടി.സിയുടെ ലോഫ്ലോർ ബസുകൾ ക്ലാസ്​ ​മുറികളാകുന്നു. ആദ്യഘട്ടമെന്ന നിലയിൽ രണ്ട്​ ലോഫ്ലോർ ബസുകൾ മണക്കാട് ടി.ടി.ഐക്ക്​​ വിട്ടുനൽകുമെന്ന്​ ഗതാഗതമന്ത്രി ആൻറണി രാജു പറഞ്ഞു.

കാലപ്പഴക്കം മൂലം നിരത്തിലിറക്കാനാകാതെ നശിക്കുന്ന നിരവധി ബസുകൾ കെ.എസ്​.ആർ.ടി.സി ഡിപ്പോകളിലുണ്ട്​. ഇവയിൽ ചിലത്​ നേരത്തേ വാണിജ്യ ഔട്ട്​ലെറ്റുകൾക്ക്​ നൽകിയിരുന്നു. ഇത്തരം ബസുകളാണ്​ സ്​കൂളുകൾക്ക്​ നൽകാൻ ആലോചിക്കുന്നത്​. അതേസമയം പ്രഖ്യാപനമോ പദ്ധതിയോ ആയി ഇതിനെ പരിഗണിക്കാനാകില്ലെന്നും നിർദേശം മാത്രമാണെന്നും വിലയിരുത്തലുണ്ട്​.

ബസുകൾ ക്ലാസ്​ മുറികളാക്കുന്നതിൽ​ വിദ്യാഭ്യാസവകുപ്പി​ന്‍റെ നിലപാടും നിർണായകമാണ്​. പ്രായോഗികതയിലും വ്യക്തതക്കുറവുണ്ട്​. വിദ്യാർഥികൾക്ക് കൗതുകവും ​പുതിയ അനുഭവവും എന്ന നിലക്കായിരിക്കും ബസുകൾ നൽകുന്നതെന്നാണ്​ വിവരം.

വിദ്യാഭ്യാസമ​ന്ത്രി കൂടി പ​ങ്കെടുത്ത ചടങ്ങിലായിരുന്നു ഗതാഗതമന്ത്രിയുടെ പ്രഖ്യാപനം. 'ഒന്നാന്തരം ലോഫ്ലോർ ബസ്​ സ്കൂളുകളിലേക്കെത്തും. ഇനിയിപ്പോ ബസ്​ മതി, ക്ലാസ്​ മുറിക്ക്​ ​കെട്ടിടം വേണ്ടെന്ന്​ പറയരുതെന്ന' തമാശ പൊട്ടിച്ചായിരുന്നു ആന്‍റണി രാജുവിന്‍റെ പരാമർശങ്ങൾ.

സ്​പെയർപാർട്​സ്​ വാങ്ങാൻ പണമില്ലാത്തതിനാലും സമയത്ത്​ അറ്റകുറ്റപ്പണി നടത്താത്തതിനാലും ​എ.സി ലോഫ്ലോർ ബസുകൾ കൂട്ടത്തോടെ കട്ടപ്പുറത്തായിരുന്നു. കോവിഡ്​ കാലത്ത്​ ഓട്ടം നിലക്കുകകൂടി ചെയ്തതോടെ പ്രതിസന്ധി രൂക്ഷമായി. പ്രശ്‌നങ്ങളൊന്നുമില്ലാത്ത ബസുകളാണെങ്കിലും മാസങ്ങളോളം ഓടിക്കാതെ ഇട്ടതിനാൽ വീണ്ടും സര്‍വിസ് നടത്തണമെങ്കില്‍ വൻ തുക മുടക്കി അറ്റകുറ്റപ്പണി നടത്തേണ്ട സ്ഥിതിയാണ്​.