സർവിസ്​ നടത്താത്ത ബസ്​ തിരികെ കൊണ്ടുപോകൽ ഉൗർജിതമാക്കി കെ.എസ്​.ആർ.ടി.സി

കോട്ടയം: സർവിസ്​ നടത്താതെ വിവിധ ഡിപ്പോകളിൽ കിടക്കുന്ന മുഴുവൻ ബസും തിരികെ കൊണ്ടുപോകുന്ന നടപടി ശക്തമാക്കി കെ.എസ്​.ആർ.ടി.സി. വിവിധ ഡിപ്പോയിലായി കുറഞ്ഞത്​ 800ലധികം ബസിലെങ്കിലും സർവിസ്​ നടത്താതെ കിടക്കുന്നുണ്ടെന്നാണ്​ കോർ​പറേഷ​െൻറ കണക്ക്​. ഇത്​ തിരികെയെടുത്ത്​ ബസുകൾ ആവശ്യമുള്ള ഡിപ്പോകൾക്ക്​ നൽകുമെന്നാണ് ഔദ്യോഗിക വിശദീകരണമെങ്കിലും ലാഭകരമല്ലാത്ത സർവിസുകൾ ​േമലിൽ നടത്തേണ്ടതില്ലെന്ന തീരുമാനത്തി​െൻറ അടിസ്ഥാനത്തിലാണ്​ പുതിയ നടപടിയെന്നാണ്​ പുറത്തുവരുന്ന വിവരം.​

ജീവനക്കാരുടെ സംഘടനകളും ഇത്​ ശരിവെക്കുന്നു. എന്നാൽ, ഈ ആരോപണം കോർപറേഷൻ ഉന്നതർ നിഷേധിക്കുകയാണ്​​. കോർപറേഷ​െൻറ ഡിപ്പോകളിലും റീജനൽ വർക്​ഷോപ്പുകളിലുമായി നൂറുകണക്കിന്​ ബസുകൾ സർവിസ്​ നടത്താതെ കിടപ്പുണ്ട്​. ചിലത്​ ഉപയോഗിക്കാനാവാത്തതുമാണ്​. വിവിധ ഡിപ്പോയിലായി 10 മുതൽ 15 ബസുകൾ വരെ ഒാടുന്നില്ലെന്നും കോർപറേഷ​ൻ ചൂണ്ടിക്കാട്ടുന്നു.​

ദീർഘദൂര സർവിസുകൾക്കടക്കം ഉപയോഗിക്കാൻ പലയിടത്തും സ്​പെയർ ബസുകളുമുണ്ട്​. ഇതിൽ ന​െല്ലാരുപങ്കും സർവിസ്​ നടത്താനാവാതെ കട്ടപ്പുറത്താണ്​​. ഇതിനെല്ലാം ബാറ്ററികളും സ്​പെയർ പാർട്ടുകളും വാങ്ങാനും ഇൻഷുറൻസ്​ അടക്കാനും നല്ലൊരു തുക വേണ്ടിവരുന്നതും ഭീമനഷ്​ടത്തിന്​ ഇടയാക്കുന്നുണ്ട്​.​ ബസുകൾ തിരികെയെടുക്കാൻ ഇതും കാരണമാണെന്ന് കെ.എസ്​.ആർ.ടി.സി ഓപറേഷൻസ്​ വിഭാഗം ചൂണ്ടിക്കാട്ടുന്നു. തിരികെയെടുത്ത ബസുകൾക്ക്​ പകരം ആവശ്യമെങ്കിൽ സർവിസ്​ യോഗ്യമായ ബസുകൾ എത്തിക്കുമെന്നും തിരികെയെടുക്കുന്ന നടപടി തുടരുമെന്നും ഓപറേഷൻസ്​ വിഭാഗത്തിലെ ഉന്നതർ 'മാധ്യമ'ത്തോട്​ പറഞ്ഞു. പുതിയ സർവിസുകൾ അനുവദിക്കുമ്പോഴും അറ്റകുറ്റപ്പണിക്ക്​ സർവിസിലുള്ള ബസുകൾ മാറ്റുമ്പോഴും ആവശ്യമായ ബസുകൾ അതത് ഡിപ്പോകൾക്ക്​ ലഭ്യമാക്കുമെന്നും അധികൃതർ വ്യക്തമാക്കുന്നു.

കോട്ടയത്തെ വിവിധ ഡിപ്പോകളിൽ കഴിഞ്ഞ ദിവസങ്ങളിലായി 95 ബസ്​ തിരികെ കൊണ്ടുപോയിരുന്നു. ഏറ്റവും കൂടുതൽ ബസുകൾ തിരികെയെടുത്തത് ഈരാറ്റുപേട്ട ഡിപ്പോയിൽനിന്നാണ് _​-20 എണ്ണം. അറ്റകുറ്റപ്പണിക്കും മറ്റുമായാണ് തിരികെ കൊണ്ടുപോയതെന്നാണ് കെ.എസ്.ആർ.ടി.സി നൽകിയിരിക്കുന്ന വിശദീകരണം. അതേസമയം, ബസ്​ തിരിച്ചെടുക്കൽ ലോക്​ഡൗണിനുശേഷം ദീർഘദൂര സർവിസുകളെ പ്രതിസന്ധിയിലാക്കുമെന്ന്​​ ഡിപ്പോ അധികൃതർ മുന്നറിയിപ്പ്​ നൽകുന്നു.