കെ.എസ്​.ആർ.ടി.സി: മൂന്നിലൊന്ന്​ ശമ്പളവും ബാക്കി കൂപ്പണുകളും നൽകാൻ ഹൈകോടതി ഉത്തരവ്​

കൊച്ചി: കെ.എസ്.ആർ.ടി.സി ജീവനക്കാർക്ക്​ സർക്കാർ നൽകുന്ന 50 കോടി രൂപ കൊണ്ട്​ ശമ്പള കുടിശ്ശികയുടെ മൂന്നിലൊന്നും ബാക്കി കുടിശ്ശികക്ക്​​ ഭക്ഷ്യവസ്തുക്കളും വസ്ത്രങ്ങളും വാങ്ങാൻ കൂപ്പണുകളും നൽകാൻ ഹൈകോടതി ഉത്തരവ്​. ജൂലൈ, ആഗസ്റ്റ്​ മാസങ്ങളിലെ ശമ്പളവും ബോണസും ജീവനക്കാർക്ക്​ ലഭ്യമാക്കാൻ 103 കോടി രൂപ സർക്കാർ നൽകണമെന്ന സിംഗിൾ ബെഞ്ച് ഉത്തരവിനെതിരെ സർക്കാർ നൽകിയ അപ്പീലിലാണ് ജസ്റ്റിസ് എ.കെ. ജയശങ്കരൻ നമ്പ്യാർ, ജസ്റ്റിസ് സി.പി. മുഹമ്മദ് നിയാസ്​ എന്നിവരടങ്ങുന്ന ഡിവിഷൻ ബെഞ്ചിന്‍റെ ഇടക്കാല ഉത്തരവ്​​.

ശമ്പളം നൽകാൻ 50 കോടി രൂപ നൽകാമെന്ന്​ സർക്കാർ കഴിഞ്ഞ ദിവസം കോടതിയെ അറിയിച്ചിരുന്നു. മൂന്നിലൊന്ന് ശമ്പളവും ബാക്കി തുകക്കുള്ള കുപ്പണുകളും സെപ്റ്റംബർ ആറിനകം വിതരണം ചെയ്യണം. സർക്കാർ നിയന്ത്രണത്തിലുള്ള സിവിൽ സപ്ലൈസ് കോർപറേഷൻ, കൺസ്യൂമർഫെഡ്​, മാവേലി സ്റ്റോർ, ഹോർട്ടികോർപ്​, ഹാൻ​ടെക്സ്​, ഹൻവിവ്​, ഖാദി ബോർഡ്​ തുടങ്ങിയ സ്ഥാപനങ്ങളുടെ കൂപ്പണുകളാണ്​ നൽകേണ്ടത്​. കൂപ്പൺ വേണ്ടെന്ന് പറയുന്നവരുടെ ശമ്പളം കുടിശ്ശികയായി കണക്കാക്കാനും​ കോടതി നിർദേശിച്ചു. കെ.എസ്.ആർ.ടി.സിയുടെയും സർക്കാറിന്‍റെയും സാമ്പത്തിക പ്രതിസന്ധി കണക്കിലെടുത്താണ് ഈ നിർദേശം നൽകുന്നതെന്ന്​ കോടതി വ്യക്തമാക്കി.

കെ.എസ്.ആർ.ടി.സി ജീവനക്കാരുടെ ശമ്പളം വൈകുന്നതിനെതിരെ ജീവനക്കാരനായ ആർ. ബാജിയടക്കമുള്ളവർ നൽകിയ ഹരജിയിലായിരുന്നു സർക്കാർ 103 കോടി രൂപ നൽകണമെന്ന് സിംഗിൾ ബെഞ്ച് ഉത്തരവിട്ടത്. എന്നാൽ, കെ.എസ്.ആർ.ടി.സി ജീവനക്കാരും സർക്കാറും തമ്മിൽ തൊഴിലാളി - തൊഴിലുടമ ബന്ധമല്ലെന്നും ജീവനക്കാരെ നിയമിക്കുന്നത് കെ.എസ്.ആർ.ടി.സിയാണെന്നും ചൂണ്ടിക്കാട്ടിയാണ് സർക്കാർ അപ്പീൽ നൽകിയത്. അപ്പീൽ പരിഗണിച്ച ഡിവിഷൻ ബെഞ്ച്​ കഴിഞ്ഞ ദിവസം സിംഗിൾ ബെഞ്ച്​ ഉത്തരവ്​ സ്റ്റേ ചെയ്തിരുന്നു. സർക്കാർ തീരുമാനമെടുക്കേണ്ട വിഷയങ്ങളിൽ കോടതി ഉത്തരവ് പുറപ്പെടുവിക്കുന്നത് ഉചിതമല്ലാത്തതിനാലാണ് ഉത്തരവ് സ്റ്റേ ചെയ്തതെന്ന്​ ഡിവിഷൻ ബെഞ്ച് വ്യക്തമാക്കി.

അതേസമയം, ശമ്പളം പണമായിത്തന്നെ കിട്ടണമെന്നാണ്​ ഹരജിക്കാരുടെ ആവശ്യം. തുടർന്ന്​ അപ്പീൽ ഹരജി വീണ്ടും സെപ്റ്റംബർ 22ന്​ പരിഗണിക്കാൻ മാറ്റി.