ഭക്ഷണ ബില്ലിനെ ചൊല്ലി കടയുടമയുമായി സംഘർഷം, കെ.എസ്.ആർ.ടി.സി ജീവനക്കാരൻ അറസ്റ്റിൽ; മദ്യലഹരിയിലെന്ന് പൊലീസ്

തിരുവല്ല: ഭക്ഷണം കഴിച്ചതിന്റെ ബില്ലിനെ ചൊല്ലി കടയുടമയുമായി സംഘർഷമുണ്ടാക്കിയ കെ.എസ്.ആർ.ടി.സി ജീവനക്കാരൻ അറസ്റ്റിൽ. കെ.എസ്.ആർ.ടി.സി അടൂർ ഡിപ്പോ ജീവനക്കാരൻ തിരുവനന്തപുരം വെള്ളറട കുടപ്പനംമൂട് കുളക്കാട്ട് വീട്ടിൽ എബി സാം ചാക്കോ (31) ആണ് അറസ്റ്റിലായത്. ഇയാൾ മദ്യലഹരിയിലായിരുന്നെന്ന് പൊലീസ് പറഞ്ഞു.

തിരുവല്ല കെ.എസ്.ആർ.ടി.സി ബസ് സ്റ്റാൻഡിലെ സ്റ്റാളിൽ ശനിയാഴ്ച വൈകീട്ട് ആറിനാണ് സംഭവം. ഇയാൾ കടയിൽ നിന്ന് ഭക്ഷണം വാങ്ങി കഴിച്ചശേഷം ബിൽ തുക കൂടുതലാണെന്ന് ആരോപിച്ച് കടയുടമയുമായി ബഹളമുണ്ടാക്കുകയായിരുന്നു.

ഇത് തടയാനെത്തിയ ഡ്യൂട്ടി പൊലീസുകാരനെയും ഇയാൾ അസഭ്യം പറഞ്ഞതിനെ തുടർന്നാണ് അറസ്റ്റ് ചെയ്തത്. അതേസമയം, എബിയെ സ്റ്റാളിലുള്ളവർ മർദിച്ചതായും പരാതിയുണ്ട്.