മണലൂരിൽ പേയ്​മെൻറ്​ സീറ്റെന്ന്​; കെ.പി.സി.സി അംഗം പാർട്ടി വിട്ടു, കരയാനോ മൊട്ടയടിക്കാനോ ഇല്ലെന്നും സി.ഐ സെബാസ്​റ്റ്യൻ

തൃശൂർ: മണലൂർ മണ്ഡല​ത്തിൽ പേയ്​മെൻറ്​ സീറ്റാണെന്ന്​ ആരോപിച്ച്​ കെ.പി.സി.സി. അംഗവും ജില്ലയിലെ മുതിർന്ന കോൺഗ്രസ്​ നേതാവുമായ സി.ഐ സെബാസ്​റ്റ്യൻ പാർട്ടി വിട്ടു. ഒരു ജനപ്രതിനിധിയടക്കം ജില്ല കോൺഗ്രസ്​ കമ്മിറ്റിയിലെ നേതാക്കളാണ്​ സ്​ഥാനാർഥി നിർണയത്തിൽ പണം കൈപ്പറ്റിയതെന്ന്​ സി.ഐ സെബാസ്​റ്റ്യൻ തൃശൂരിൽ വാർത്തസമ്മേളനത്തിൽ ആരോപിച്ചു.

ജില്ലയിൽ എ ഗ്രൂപ്പിനായി നിശ്​ചയിക്കപ്പെട്ട മണലൂർ മണ്ഡലത്തിൽ 1996 മുതൽ പരിഗണിക്കുന്ന വ്യക്​തിയാണ്​ 40 വർഷമായി കോൺഗ്രസി​െൻറ വിവിധ ഘടകങ്ങളിൽ പ്രവർത്തിക്കുന്ന താനെന്ന്​ സെബാസ്​റ്റ്യൻ പറഞ്ഞു. തുടർന്ന്​ 2001, 2006, 2011, 2016 തെരഞ്ഞെടുപ്പുകളിൽ സീറ്റ്​ നിഷേധിക്കപ്പെട്ടപ്പോൾ പ്രതിഷേധിച്ചില്ല. എന്നാൽ ഇത്തവണ എ​ ഗ്രൂപ്പുമായി പുലബന്ധം പോലുമില്ലാത്ത, അത്രയധികം പ്രവർത്തന പാരമ്പര്യമില്ലാത്ത മണ്ഡലത്തിന്​ പുറത്തുള്ള ഒരാളെ പരിഗണിച്ചത്​ പണം വാങ്ങിത്തന്നെയാണ്​. കഴിഞ്ഞ തദ്ദേശ തെരഞ്ഞെടുപ്പിലും വ്യാപകമായി പണം വാങ്ങി സീറ്റ്​ നൽകിയിരുന്നു. ഇനി പ്രതികരിക്കാതിരിക്കാനാവില്ല.

സ്​ഥാനാർഥികളെ പ്രഖ്യാപിച്ച ഞായറാഴ്​ച രാവിലെ 11 മണി വരെ ഉമ്മൻചാണ്ടി ഫോണിൽ സംസാരിച്ചപ്പോൾ സ്​ഥാനാർഥിത്വം സംബന്ധിച്ച്​ പ്രതീക്ഷ തന്നിരുന്നു. ബയോഡാറ്റ പ്രത്യേകം വാങ്ങിവെക്കുകയും ചെയ്​തു. എന്നാൽ പ്രഖ്യാപനശേഷം ഇതുവരെയായി ഉമ്മൻ ചാണ്ടിയോ, എ.കെ. ആൻറണിയോ ഫോൺ എടുത്തിട്ടില്ല. എനിക്ക്​ സീറ്റ്​ നിഷേധിച്ചതിന്​ നീതീകരണം ഇല്ല. നിശ്​ചയദാർഡ്യം ഉള്ളതിനാൽ പൊട്ടിക്കരയുന്നില്ല എന്നേ ഉള്ളൂ. കരയാനോ തല മൊട്ടയടിക്കാനോ ഞാനില്ല. കെ.പി.സി.സി അംഗത്വം രാജിവെച്ച കത്ത്​ ഉടൻ സോണിയാ ഗാന്ധിക്ക്​ ഉൾപ്പെടെ കൈമാറും. എ​െൻറ ആശയ സംഹിതകളോട്​ യോജിക്കുന്ന പാർട്ടികളുമായി ചേർന്ന്​ പ്രവർത്തിക്കും.