ഹർത്താൽ സംഘർഷം അമർച്ച ചെയ്യുന്നതിൽ വീഴ്​ച; കമീഷണർമാരെ​ മാറ്റി

തിരുവനന്തപുരം: ഹർത്താലിനിടയിലെ അക്രമം തടയുന്നതിൽ വീഴ്​ചയുണ്ടായെന്ന വിലയിരുത്തലി​​​െൻറ അടിസ്ഥാനത്തിൽ തിരുവനന്തപുരം, കോഴിക്കോട്​ സിറ്റി പൊലീസ്​ കമീഷണർമാർക്ക്​ സ്ഥാനചലനം. തിരുവനന്തപുരം സിറ്റി പൊലീസ്​ കമീഷണർ പി. പ്രകാശിനെ ആംഡ്​ പൊലീസ്​ ബറ്റാലിയനിലേക്കും കോഴിക്കോട്​ സിറ്റി പൊലീസ്​ കമീഷണർ കാളിരാജ്​ മഹേഷ്​കുമാറിനെ പൊലീസ്​ ആസ്ഥാനത്ത്​ ഡി.​െഎ.ജിയുമായാണ്​ മാറ്റിയത്​. ആലപ്പുഴ ജില്ല പൊലീസ്​ മേധാവിയുടെ അധിക ചുമതല വഹിക്കുന്ന ഇൻറലിജൻസ്​ ഡി.​െഎ.ജി എസ്​. സുരേന്ദ്രനാണ്​ പുതിയ തിരുവനന്തപുരം കമീഷണർ. പൊലീസ്​ ആസ്ഥാനത്തെ ഡി.​െഎ.ജിയായിരുന്ന കോറി സഞ്​ജയ്​കുമാർ ഗുരുദിൻ ആണ്​ ​പുതിയ കോഴിക്കോട്​ കമീഷണർ. കോഴിക്കോട്​ സിറ്റി ഡെപ്യൂട്ടി പൊലീസ്​ കമീഷണർ കെ.എം. ടോമി​െയയും മാറ്റി. ആലപ്പുഴ ജില്ല പൊലീസ്​ മേധാവിയായാണ്​ പുതിയ നിയമനം. വിജിലൻസ്​ എസ്​.പി ​െജയിംസ്​ ജോസഫാണ്​ പുതിയ കോഴിക്കോട്​ ഡെപ്യൂട്ടി കമീഷണർ.

ഇൗമാസം മൂന്നിന്​ ശബരിമല കർമസമിതിയുടെ നേതൃത്വത്തിൽ നടന്ന ഹർത്താലിനിടെ ക്രമസമാധാനപാലനത്തിൽ സംഭവിച്ച വീഴ്​ചയാണ്​ സ്ഥാനചലനത്തിന്​ കാരണമായത്​. കോഴിക്കോട്​ മിഠായിത്തെരുവിലെ ആക്രമണം തടയുന്നതിലും കച്ചവടക്കാർക്ക്​ സംരക്ഷണം നൽകുന്നതിലും പൊലീസിന്​ ഗുരുതരവീഴ്​ച സംഭവിച്ചതായി രഹസ്യാന്വേഷണ വിഭാഗവും റിപ്പോർട്ട്​ ചെയ്​തിരുന്നു. പൊലീസ്​ നിഷ്​ക്രിയത്വമാണ്​ കോഴിക്കോട്​അക്രമത്തി​​​െൻറ വ്യാപ്​തി വർധിപ്പിച്ചതെന്ന്​ വ്യാപാരികളും പരാതി നൽകിയിരുന്നു.

ഹർത്താൽദിനത്തിൽ കച്ചവടക്കാർക്ക്​ സംരക്ഷണം ഉറപ്പാക്കണമെന്ന്​ ചീഫ്​ സെക്രട്ടറി ടോം ജോസും ഡി.ജി.പി ലോക്​നാഥ്​ ബെഹ്​റയും നിർ​േദശം നൽകിയിട്ടും തിരുവനന്തപുരം നഗരത്തിലെ ചാലയുൾപ്പെടെ സ്ഥലങ്ങളിൽ നടപടിയുണ്ടായില്ല. സെക്ര​േട്ടറിയറ്റിന്​ മുന്നിൽ ബി.ജെ.പി-സി.പി.എം പ്രവർത്തകർ തമ്മിൽ ഏറ്റുമുട്ടലിലേക്ക്​ കാര്യങ്ങൾ എത്തിച്ചതും പൊലീസ്​ വീഴ്​ചയായി രഹസ്യാന്വേഷണ വിഭാഗം റിപ്പോർട്ട്​ ചെയ്​തിരുന്നു. പ്രകാശിനെ മാറ്റണമെന്ന്​ രാഷ്​ട്രീയ പാർട്ടികളും ആവശ്യപ്പെട്ടിരുന്നു. ഇതെല്ലാം​ പി. പ്രകാശി​​​െൻറ സ്ഥാനചലനത്തിനിടയാക്കി.