കോട്ടയം ഈരാറ്റുപേട്ടയിൽ ഉരുൾപൊട്ടൽ; മീനച്ചിലാറ്റിൽ ജലനിരപ്പ് ഉയർന്നു

ഈരാറ്റുപേട്ട: കോട്ടയം ജില്ലയിലെ ഈരാറ്റുപേട്ട അടുക്കത്ത് ഉരുൾപൊട്ടൽ. രണ്ടു തവണ വലിയ ശബ്ദത്തിലാണ് ഉരുൾപൊട്ടൽ ഉണ്ടായതെന്ന് പ്രദേശവാസികൾ പറഞ്ഞു.

ഉരുൾപൊട്ടിയ വെള്ളം വൈകുന്നേരത്തോടെ കോട്ടയം നഗര പ്രദേശം, തിരുവാർപ്പ്, അയ്മനം, കുമരകം എന്നിവിടങ്ങളിലേക്ക് വെള്ളം എത്തുമെന്നാണ് റിപ്പോർട്ട്. പാലാ നഗരം, പാലാ-ഭരണങ്ങാനം, പാലാ-ഈരാറ്റുപേട്ട എന്നീ പാതകളിലും പാലാ നഗരത്തിലെ കടകളിലും വെള്ളം കയറുന്നുണ്ട്.

മീനച്ചിലാറ്റിൽ ജലനിരപ്പ് ഉയർന്നതിനെ തുടർന്ന് തീരപ്രദേശത്തെ ആളുകളെ മാറ്റിപ്പാർപ്പിച്ചു. താഴ്ന്ന പ്രദേശങ്ങളിൽ വെള്ളം കയറാൻ സാധ്യതയുണ്ടെന്ന് ജില്ലാ അധികൃതർ മുന്നറിയിപ്പ് നൽകി.

കോട്ടയം-കുമളി ദേശീയപാതയിൽ വാഹന ഗതാഗതത്തിന് നിയന്ത്രണം ഏർപ്പെടുത്തി. കെ.കെ. റോഡിൽ വാഹന ഗതാഗതം മുണ്ടക്കയം വരെ മാത്രമാണ്. ഉരുൾപൊട്ടൽ ഭീഷണി നിലനിൽക്കുന്ന സാഹചര്യം പരിഗണിച്ചാണ് പൊലീസ് നിയന്ത്രണം ഏർപ്പെടുത്തിയത്.