‘ബിന്ദുവിന്‍റെ​​ ജീവൻ നഷ്ടപ്പെട്ട സ്ഥലത്ത് മകന് ജോലി വേ​ണ്ട; മെഡിക്കൽ കോളജിൽ ജോലി ​ചെയ്യാൻ മാനസിക ബുദ്ധിമുട്ടുണ്ട്​​​’ -മന്ത്രി വീണ ജോർജിനോട് ബിന്ദുവിന്റെ ഭർത്താവ്

തലയോലപ്പറമ്പ് (കോട്ടയം): കെട്ടിടം തകർന്ന് വീണ് മരിച്ച ബിന്ദുവിന്റെ മകൻ നവനീതിന് കോട്ടയം മെഡിക്കൽ കോളജ്​ ആശുപത്രിയിൽ സംസ്ഥാന സർക്കാർ വാഗ്​ദാനം ചെയ്ത താൽക്കാലിക ജോലി വേണ്ടെന്ന് ബിന്ദുവിന്റെ ഭർത്താവ് വിശ്രുതൻ. മകന്‍റെ പഠിപ്പിനനുസരിച്ച്​ ജോലി കിട്ടിയാൽ നന്നായിരിക്കുമെന്നും​ വീട് സന്ദർശിച്ച ആരോഗ്യമന്ത്രി വീണ ജോർജിനെ അറിയിച്ചെന്ന്​​ അദ്ദേഹം പറഞ്ഞു.

‘ബിന്ദുവിന്‍റെ​​ ജീവൻ നഷ്ടപ്പെട്ട ഇടമായതിനാൽ ഇവിടെ ജോലിചെയ്യുന്നതിന്​ മകന്​ മാനസിക ബുദ്ധിമുട്ടുണ്ട്​. അതിനാലാണ്​ ആ ജോലി വേണ്ടെന്നു തീരുമാനിച്ചത്​. ഇനി കുടുംബത്തിന്‍റെ ഏക ആശ്രയം​ മകനാണ്​. അവന്​ സ്ഥിരംജോലി നൽകണമെന്ന്​ ആവശ്യപ്പെട്ടിട്ടുണ്ട്’ -വിശ്രുതൻ പറഞ്ഞു.

തൊടുപുഴ അൽ അസ്​ഹർ കോളജിൽനിന്ന്​ സിവിൽ എൻജിനീയറിങ്​ കഴിഞ്ഞ നവനീത്,​ കഴിഞ്ഞമാസമാണ്​ എറണാകുളത്ത്​ സ്വകാര്യസ്ഥാപനത്തിൽ ജോലിക്കുകയറിയത്​. ബിന്ദു ജോലി ചെയ്തിരുന്ന തലയോലപ്പറമ്പിലെ വസ്ത്രശാലയുടെ ഉടമ ആനന്ദാക്ഷൻ ഒരു ലക്ഷം രൂപ സഹായം നൽകുമെന്ന്​ അറിയിച്ചിട്ടുണ്ട്​. ബിന്ദുവിന്‍റെ അമ്മക്ക്​ മാസം 5000 രൂപ വീതം ആജീവനാന്തം നൽകും.

അതിനിടെ, പ്രതിപക്ഷസംഘടനകളുടെ പ്രതിഷേധം ഭയന്ന്​ ആരോഗ്യമന്ത്രി വീണ ജോർജ്​ പൊലീസ്​ സുരക്ഷയില്ലാതെയാണ് ബിന്ദുവിന്‍റെ തലയോലപ്പറമ്പിലെ വീട്ടിലെത്തിയത്. രാവിലെ ഏഴിനെത്തിയ ഇവർ 20 മിനിറ്റ്​ വീട്ടുകാർക്കൊപ്പം ചെലവഴിച്ചു. മന്ത്രി ശനിയാഴ്ച ഫോണിൽ വിളിച്ച്​ താൻ വീട്ടിൽ വരുമെന്ന്​ ബിന്ദുവിന്‍റെ ഭർത്താവ്​ വിശ്രുതനെ അറിയിച്ചിരുന്നെങ്കിലും ദിവസവും സമയവും പറഞ്ഞിരുന്നില്ല.

ഞായറാഴ്ച രാവിലെ പത്തനംതിട്ടയിൽനിന്ന്​ പൊലീസ്​ സുരക്ഷയില്ലാതെ ഔദ്യോഗിക വാഹനത്തിൽ തലയോലപ്പറമ്പിലെ സുഹൃത്തിന്‍റെ വീട്ടിലെത്തി. തുടർന്ന്​​ തലയോലപ്പറമ്പ്​​ സ്​റ്റേഷനിലും കടുത്തുരുത്തി സ്​റ്റേഷനിലും അറിയിച്ചെങ്കിലും പൊലീസ്​ വാഹനം വരുന്നതിനുമുമ്പ്​ സുഹൃത്തിന്‍റെ വാഹനത്തിൽ ബിന്ദുവിന്‍റെ വീട്ടിലേക്കു വരികയായിരുന്നു.

സി.പി.എം സംസ്ഥാന കമ്മിറ്റി അംഗം അഡ്വ. ​കെ. അനിൽകുമാർ, ജില്ല സെക്രട്ടറി ടി.ആർ. രഘുനാഥൻ അടക്കം പാർട്ടി നേതാക്കളാണ്​ ഒപ്പമുണ്ടായിരുന്നത്​. ബിന്ദുവിന്റെ അമ്മ സീതാലക്ഷ്മി, ഭര്‍ത്താവ് വിശ്രുതന്‍, മക്കളായ നവനീത്, നവമി എന്നിവരെയും ബന്ധുക്കളെയും ആശ്വസിപ്പിച്ച മന്ത്രി, സർക്കാർ കൂടെയുണ്ടാകുമെന്ന്​ ഉറപ്പുനൽകി. മന്ത്രിസഭയോഗശേഷം മുഖ്യമന്ത്രി സഹായം പ്രഖ്യാപിക്കുമെന്നും അറിയിച്ചു. തലയോലപ്പറമ്പ്​ പൊലീസിന്‍റെ​ സുരക്ഷയിലായിരുന്നു മടക്കം. മന്ത്രി വന്നതിൽ സന്തോഷമു​ണ്ടെന്നും​ കക്ഷിരാഷ്ട്രീയ ഭേദമന്യേ എല്ലാവരും കുടുംബത്തോടൊപ്പം നിന്നതായും വിശ്രുതൻ മാധ്യമപ്രവർത്തകരോട്​ പറഞ്ഞു.