കോട്ടയത്ത്​ ജയിൽ ചാടിയ കൊലക്കേസ് പ്രതി മണിക്കൂറുകൾക്കകം പിടിയിൽ

കോട്ടയം: ജയിൽ ചാടിയ കൊലക്കേസ്​ പ്രതിയെ മണിക്കൂറുകൾക്കകം പൊലീസ്​ പിടികൂടി. ശനിയാഴ്ച പുലര്‍ച്ച​ ജയിലിൽനിന്ന്​ രക്ഷപ്പെട്ട വിചാരണ തടവുകാരനായ പാറമ്പുഴ മോളയില്‍ ബിനുമോനെയാണ്​ (38) രാത്രി ഒമ്പതുമണിയോടെ മീനടത്ത്​ വീടിനു സമീപത്തുനിന്ന്​​ പിടികൂടിയത്​. ഈസ്റ്റ് സി.ഐ യു. ശ്രീജിത്, എസ്.ഐ എം.എച്ച്. അനുരാജ് എന്നിവരുടെ നേതൃത്വത്തിൽ​ പാമ്പാടി പൊലീസിന്റെ സഹകരണത്തോടെയാണ്​ ഇയാളെ പിടികൂടിയത്​. ജില്ല ജനറൽ ആശുപത്രിയിൽ ​വൈദ്യപരിശോധനക്കുശേഷം ഈസ്റ്റ്​ സ്​റ്റേഷനിലെത്തിച്ചു.

കഴിഞ്ഞ ജനുവരിയില്‍ മുട്ടമ്പലം ഉറുമ്പനത്ത്​ ഷാന്‍ ബാബുവിനെ (19) കൊലപ്പെടുത്തി കോട്ടയം ഈസ്​റ്റ്​ പൊലീസ് സ്‌റ്റേഷനു മുന്നില്‍ കൊണ്ടിട്ട കേസിലെ അഞ്ചാംപ്രതിയായിരുന്നു ഓട്ടോ ഡ്രൈവറായ ബിനുമോൻ. ജയിലിൽ പാചക ജോലിക്ക്​ നിയോഗിക്കപ്പെട്ടിരുന്ന ഇയാളെ മറ്റ്​ തടവുകാർക്കൊപ്പം രാവിലെ 4.30ന് സെല്ലില്‍നിന്ന്​ പുറത്തിറക്കിയിരുന്നു. പ്രാഥമികകൃത്യങ്ങള്‍ നിര്‍വഹിക്കാന്‍ പോയ ബിനു, ഇതിനിടെ 4.53 ഓടെ രക്ഷപ്പെടുകയായിരുന്നു. ജയിലിന്‍റെ കിഴക്കു​ വശത്തെ മതിലിലേക്ക്​​ പലകചാരി ഇതിലൂടെ ചവിട്ടിക്കയറിയശേഷം മുകളിലൂടെ കടന്നുപോകുന്ന കേബിള്‍ വഴി തൂങ്ങി പുറത്തുകടന്നുവെന്നാണ്​ സൂചന.

പുറത്തുകടന്ന ബിനുമോൻ കോട്ടയം ഈസ്റ്റ്​ പൊലീസ്​ സ്‌റ്റേഷന്​ സമീപത്തെ ബസ്​ സ്​റ്റോപ്പ്​വരെ എത്തുന്നതിന്‍റെ സി.സി.ടി.വി. ദൃശ്യങ്ങള്‍ പൊലീസിന്​ ലഭിച്ചിരുന്നു. സംഭവസ്ഥലത്തെത്തിയ പൊലീസ് നായും ബസ് സ്‌റ്റോപ് വരെയെത്തിമടങ്ങി. ജയിലിനുള്ളിൽ പല്ലു തേക്കുമ്പോള്‍ ലുങ്കിയും ടീ ഷര്‍ട്ടും ധരിച്ചിരുന്ന ബിനു സി.സി.ടി.വി. ദൃശ്യത്തില്‍ ജീന്‍സും ഷര്‍ട്ടും ആണ്​ ധരിച്ചിരുന്നത്. ഇതിനിടെ കോട്ടയം കഞ്ഞിക്കുഴിയിലെ സുഹൃത്തിന്‍റെ വീട്ടില്‍ എത്തിയെന്ന വിവരത്തിന്‍റെ അടിസ്ഥാനത്തിൽ സുഹൃത്തിനെ പൊലീസ്​ കസ്റ്റഡിയിലെടുത്തിരുന്നു. വീട്ടിൽ വന്നതായി സമ്മതിച്ച സുഹൃത്ത്​, ജയില്‍ ചാടി എത്തിയതാണെന്ന്​ അറിഞ്ഞതോടെ പൊലീസില്‍ അറിയിക്കുമെന്നു പറഞ്ഞതായും ഇതോടെ ബിനു മുങ്ങിയെന്നുമാണ്​ ​ മൊഴി നൽകിയത്​. കോട്ടയം നഗരത്തിലും പരിസരപ്രദേശങ്ങളിലും പൊലീസ് വ്യാപകമായ തിരച്ചില്‍ നടത്തി. ബന്ധുക്കളുടെയും സുഹൃത്തുക്കളുടെയും വീടുകളിലും മേഖലയിലെ റബർ തോട്ടങ്ങളിലെ ഒഴിഞ്ഞ കെട്ടിടങ്ങളിലും പരിശോധന നടത്തി​​. ഇയാൾ പണം ചോദിച്ച്​ എത്താൻ സാധ്യതയുള്ള വ്യക്​തികളും നിരീക്ഷണത്തിലായിരുന്നു​. ഒന്നിലേറെ തവണ ഇയാള്‍ ജാമ്യാപേക്ഷ നല്‍കിയിരുന്നുവെങ്കിലും കോടതി തള്ളിയിരുന്നു.

കഴിഞ്ഞദിവസം ബിനുമോനെ സന്ദര്‍ശിക്കാൻ ഭാര്യ ജയിലില്‍ എത്തിയിരുന്നു. എത്രയുംപെട്ടെന്ന് തനിക്ക് ജയിലില്‍നിന്ന് പുറത്തിറങ്ങണമെന്ന് ഇയാള്‍ ഭാര്യയോട് പറഞ്ഞിരുന്നതായാണ് വിവരം. പ്രതികളുമായി നേരത്തേ ബന്ധമുണ്ടായിരുന്നുവെങ്കിലും മറ്റ്​ കേസുകളിലൊന്നും പ്രതിയല്ലെന്ന്​ പൊലീസ് പറഞ്ഞു. കൂടുതൽ കേസുകൾ ഇല്ലാത്തതിനാലും ജയിലില്‍ ശാന്തസ്വഭാവക്കാരനായതിനാലുമാണ്​ ഇയാള്‍ക്ക് അടുക്കളയിൽ ജോലി നല്‍കിയതെന്നാണ്​​ ജയിൽ അധികൃതർ പറയുന്നത്​. സംഭവത്തിൽ ഉത്തരമേഖല ജയിൽ ഡി.ഐ.ജി സാം തങ്കയ്യൻ ജയിൽ സന്ദർശിച്ച്​ ഉദ്യോഗസ്​ഥരിൽനിന്ന്​ മൊഴി​യെടുത്തു. വീഴ്ച വരുത്തിയവർക്കെതി​രെ നടപടി വന്നേക്കും.