കഥകളി ആചാര്യൻ കോട്ടക്കൽ ശംഭു എമ്പ്രാന്തിരി അന്തരിച്ചു

കോട്ടക്കല്‍: അഞ്ച്​ പതിറ്റാണ്ടിലേറെക്കാലം സ്ത്രീവേഷത്തിലൂടെ അരങ്ങിലെത്തി ​​ശ്രദ്ധേയനായ കഥകളി കലാകാരൻ ശംഭു എമ്പ്രാന്തിരി ആശാൻ (77) നിര്യാതനായി. ശാരീരികാവശതകളെത്തുടര്‍ന്ന് തൃശൂര്‍ അമല ആശുപത്രിയില്‍ ചികിത്സയിലായിരുന്നു. തിങ്കളാഴ്​ച വൈകീട്ട്​ നാലരയോടെയായിരുന്നു അന്ത്യം.

1942ൽ പാലക്കാട് തൂതയിൽ ശംഭു എമ്പ്രാന്തിരിയുടെയും ലക്ഷ്മി അന്തർജനത്തി​​​െൻറയും മകനായി ജനിച്ച ഇദ്ദേഹം തേക്കിന്‍കാട്ടില്‍ രാവുണ്ണിനായർ ആശാ‍​​െൻറ കീഴിലായിരുന്നു കഥകളി പഠനമാരംഭിച്ചത്​. ഗാന്ധിസേവാസദനത്തിലും തുടർന്ന് 1964ൽ പി.എസ്.വി നാട്യസംഘത്തിലും ചേർന്ന് അഭ്യസനം പൂര്‍ത്തിയാക്കി. വാഴേങ്കട കുഞ്ചുനായര്‍, കോട്ടക്കല്‍ കൃഷ്ണന്‍കുട്ടിനായര്‍ എന്നിവരായിരുന്നു മറ്റ്​ ഗുരുനാഥന്മാര്‍. നാൽപതുവര്‍ഷത്തോളം നാട്യസംഘത്തിലെ സ്ഥിരാംഗമായിരുന്നു.

2002ൽ പി.എസ്.വിയിൽനിന്ന്​ വിരമിച്ചു. മുഖ്യമായും സ്ത്രീവേഷങ്ങളിലൂടെയായിരുന്നു അരങ്ങിലെത്തിയത്. വാഴേങ്കട മുതല്‍ കോട്ടക്കല്‍ ചന്ദ്രശേഖര വാര്യർ വരെയുള്ളവര്‍ക്കൊപ്പം നായിക കഥാപാത്രങ്ങളെ അവതരിപ്പിച്ചു. പിന്നീട്​ അരങ്ങില്‍നിന്ന് സ്വമേധയാ വിട്ടുനിന്നു.

കലാമണ്ഡലം പുരസ്കാരം, പാലക്കാട് കേളി കഥകളി ആസ്വാദക പുരസ്കാരം, കോട്ടക്കൽ ശിവരാമൻ സ്മൃതി പുരസ്കാരം, ഈ വർഷത്തെ പട്ടിക്കാംതൊടി രാമുണ്ണിമേനോൻ പുരസ്കാരം തുടങ്ങിയവ ലഭിച്ചിട്ടുണ്ട്​. ഭാര്യ: സരോജം. മക്കൾ: ബിന്ദു, ഇന്ദു, മിനി. മരുമക്കൾ: മോഹനൻ എമ്പ്രാന്തിരി, സുരേന്ദ്രൻ എമ്പ്രാന്തിരി, ശശി എമ്പ്രാന്തിരി. സംസ്കാരം ചൊവ്വാഴ്ച ഉച്ച 12ന് നന്ദേൻ കുളമ്പ് ശ്മശാനത്തിൽ.