കൊട്ടക്കാമ്പൂര്‍​: ത​ു​ടർ നടപടി ആറാഴ്​ചത്തേക്ക്​ തടഞ്ഞു

കൊച്ചി: ജോയ്​സ്​ ജോർജ്​ എം.പിയും കുടുംബാംഗങ്ങളും ആരോപണവിധേയരായ കൊട്ടക്കാമ്പൂര്‍ ഭൂമിയിടപാട് കേസിലെ കുറ്റപത്രത്തിൻമേലുള്ള ത​ു​ടർ നടപടികൾ ഹൈകോടതി ആറാഴ്​ചത്തേക്ക്​ തടഞ്ഞു. കുറ്റപത്രം വിചാരണ കോടതിയില്‍ സമര്‍പ്പിക്കാൻ അനുമതി നൽകുന്ന മുന്‍ ഉത്തരവ്​ പുനഃപരിശോധിക്കണമെന്ന ഹരജി പരിഗണിക്കവെയാണ്​ വിചാരണ കോടതിക്ക്​ ഹൈകോടതി ഇൗ നിര്‍ദേശം നല്‍കിയത്​. ഭൂമിയിടപാടിൽ സി.ബി.ഐ അന്വേഷണമാവശ്യപ്പെട്ട്​ ഹരജി നല്‍കിയ ഉടുമ്പഞ്ചോല സ്വദേശി മുകേഷാണ് പുനഃപരിശോധന ഹരജി നല്‍കിയിരിക്കുന്നത്.

എം. പിയടക്കമുള്ളവര്‍ക്കെതിരെ തെളിവില്ലാത്തതിനാൽ കേസ് അവസാനിപ്പിക്കാമെന്ന അന്തിമ റിപ്പോർട്ടാണ്​ പൊലീസ്​ തൊടുപുഴ ജില്ല സെഷന്‍സ് കോടതിയില്‍ സമര്‍പ്പിച്ചത്​. പട്ടിക വിഭാഗക്കാരുടെ ഭൂമി തട്ടിയെടുത്തതുമായി ബന്ധപ്പെട്ട് അഞ്ചു കേസാണ് ദേവികുളം പൊലീസ് രജിസ്​റ്റര്‍ ചെയ്തത്. കൊട്ടക്കാമ്പൂരില്‍ തനിക്ക് 1995 ല്‍ അഞ്ച് ഏക്കറോളം ഭൂമിയുണ്ടായിരുന്നെന്നും ഇതിനോടു ചേര്‍ന്നുണ്ടായിരുന്ന പട്ടയമില്ലാത്ത നാലേക്കര്‍ വീതമുള്ള പ്ലോട്ടുകള്‍ ഉടമകള്‍ വില്‍ക്കാന്‍ തയാറായപ്പോള്‍ ഏക്കറിന് 30,000 രൂപ വീതം നല്‍കി വാങ്ങിയെന്നുമാണ്​ കേസിലെ ഒന്നാം പ്രതിയും ജോയ്‌സ് ജോര്‍ജ് എം.പിയുടെ പിതാവുമായ പാലിയത്ത് ജോര്‍ജ് മൊഴി നല്‍കിയിരുന്നത്.

ഭൂമി നഷ്​ടപ്പെട്ടു എന്ന്​ പറയുന്നവർ തട്ടിപ്പ്​ നടന്നതായി മൊഴി നൽകിയിട്ടുമില്ലെന്ന്​ റിപ്പോർട്ടിൽ പറയുന്നു. പട്ടിക വിഭാഗത്തിലുള്ളവര്‍ ഉള്‍പ്പെട്ട കേസായതിനാല്‍ ചട്ട പ്രകാരം ഇടുക്കി ജില്ല പൊലീസ് മേധാവിയുടെ അനുമതി തേടിയ ശേഷമാണ്​ കേസ് അവസാനിപ്പിക്കാന്‍ കോടതിയില്‍ റിപ്പോര്‍ട്ട് നല്‍കിയതെന്ന് ഡിവൈ.എസ്​.പി ഹൈകോടതിയെ അറിയിച്ചിരുന്നു. കേസ്​ രണ്ടാഴ്​ചക്കുശേഷം പരിഗണിക്കാനായി മാറ്റി.