15 വര്‍ഷത്തിനിടെ ഏഴ് ദുരൂഹമരണങ്ങള്‍; കൂടത്തില്‍ കേസില്‍ വര്‍ഷങ്ങള്‍ക്ക് ശേഷം കാര്യസ്ഥന്‍ അറസ്റ്റില്‍

തിരുവനന്തപുരം: കരമന കൂടത്തില്‍ കുടുബത്തിലെ ദുരൂഹ മരണത്തില്‍ വര്‍ഷങ്ങള്‍ക്ക് ശേഷം പ്രതി അറസ്റ്റില്‍. കാര്യസ്ഥന്‍ രവീന്ദ്രൻ നായരാണ് അറസ്റ്റിലായത്. കുടുംബത്തിലെ അവസാന അംഗമായിരുന്ന ജയമാധവന്‍ നായരുടെ മരണവുമായി ബന്ധപ്പെട്ടാണ് അറസ്റ്റെന്ന് സിറ്റി പൊലീസ് കമീഷണർ അരുൾ ബി. കൃഷ്ണ അറിയിച്ചു.

കോഴിക്കോട് കൂടത്തായിയിലെ കൊലപാതക പരമ്പരകള്‍ക്ക് പിന്നാലെയാണ് കൂടത്തില്‍ കുടുംബത്തിലെ മരണങ്ങളുടെ യഥാർഥ ചിത്രവും മറനീക്കി പുറത്തുവന്നത്. 2017ൽ രജിസ്റ്റർ ചെയ്ത ഈ കേസ് ജില്ലാ ക്രൈംബ്രാഞ്ച് അന്വേഷണം നടത്തുകയായിരുന്നു. ജയമാധവന്‍നായരുടെ മരണം കൊലപാതകമാണെന്ന് നേരത്തെ കണ്ടെത്തിയിരുന്നു. ഫോറന്‍സിക് റിപ്പോര്‍ട്ടാണ് കേസില്‍ നിര്‍ണായ വഴിത്തിരിവായത്. ചോദ്യം ചെയ്യാന്‍ വിളിച്ചുവരുത്തിയ ശേഷം രവീന്ദ്രനെ ജില്ല ക്രൈംബ്രാഞ്ച് അറസ്റ്റ് ചെയ്യുകയായിരുന്നു. കൊലപാതകത്തിലൂടെ ഭൂമി തട്ടിയെടുക്കുകയായിരുന്നു രവീന്ദ്രന്‍റെ ലക്ഷ്യമെന്നാണ് പൊലീസ് പറയുന്നത്. അനിൽ, സാജു എന്നീ രണ്ടുപേർ കൂടി കുറ്റകൃത്യത്തിൽ രവീന്ദ്രനെ സഹായിച്ചെന്നാണ് ക്രൈംബ്രാഞ്ചിന്‍റെ കണ്ടെത്തൽ.

2017ലാണ് ജയമാധവന്‍ കൊല്ലപ്പെട്ടത്. കൂടത്തില്‍ തറവാട്ടിലെ കോടികളുടെ സ്വത്തിന് അനന്തരവകാശികളായ ഏഴുപേരാണ് പതിനഞ്ച് വര്‍ഷത്തിനിടെ ദുരൂഹസാഹചര്യത്തിൽ മരിച്ചത്. ഗോപിനാഥ പിള്ള, ഭാര്യ സുമുഖിയമ്മ, മക്കളായ ജയബാലകൃഷ്ണന്‍, ജയപ്രകാശ്, ജയശ്രീ, ഗോപിനാഥന്‍ നായരുടെ സഹോദരന്‍ വേലുപ്പിള്ളയുടെ മകന്‍ ഉണ്ണികൃഷ്ണന്‍ നായര്‍, ഗോപിനാഥന്‍ നായരുടെ മറ്റൊരു സഹോദരനായ നാരായണപിള്ളയുടെ മകന്‍ ജയമാധവന്‍ എന്നിവരാണ് മരിച്ചത്. ഇവര്‍ക്ക് അവകാശം ഉണ്ടായിരുന്ന സ്വത്തുക്കള്‍ ഇഷ്ടദാനമെന്ന പേരില്‍ കാര്യസ്ഥനായ രവീന്ദ്രന്‍ നായരുടെയും ചില ബന്ധുക്കളുടെയും കൈവശമെത്തി. ഇതില്‍ സംശയം ഉന്നയിച്ച് ആദ്യം നാട്ടുകാരനായ അനില്‍കുമാറും പിന്നീട് ബന്ധുവായ പ്രസന്നകുമാരിയമ്മയുമാണ് പരാതികള്‍ നല്‍കിയത്. വില്‍പ്പത്രം തയ്യാറാക്കിയത് വ്യാജമായിട്ടാണെന്ന് തുടക്കത്തിലേ കണ്ടെത്തി. ഇഷ്ടദാനമെന്നത് കള്ളമാണെന്നും കാര്യസ്ഥന്‍ രവീന്ദ്രന്‍ നായര്‍ വ്യാജരേഖ ചമച്ച് സ്വത്ത് തട്ടിയെടുത്തതാണെന്നും ഉറപ്പിച്ചു.

2017 ഏപ്രില്‍ രണ്ടിന് നടന്ന ജയമാധവന്‍ നായരുടെ മരണമാണ് ഏറ്റവും ഒടുവിലത്തെത്. അന്ന് രാവിലെ തറവാട്ടിലെത്തിയപ്പോള്‍ ജയമാധവനെ വീട്ടില്‍ ബോധംകെട്ട നിലയില്‍ കണ്ടെന്നും അടുത്ത വീട്ടില്‍ നിന്ന് ഓട്ടോറിക്ഷ വിളിച്ച് മെഡിക്കല്‍ കോളജ് ആശുപത്രിയിൽ എത്തിച്ചെങ്കിലും മരിച്ചെന്നുമാണ് രവീന്ദ്രന്‍ നായരുടെ മൊഴി. ഇത് കളവാണെന്ന് തിരുവനന്തപുരം സിറ്റി ക്രൈംബ്രാഞ്ച് എ.സി.പി എം.കെ.സുൽഫിക്കറിന്‍റെ അന്വേഷണത്തില്‍ കണ്ടെത്തി.

തൊട്ടടുത്ത് ഓട്ടോറിക്ഷയുണ്ടായിട്ടും അകലെ നിന്ന് രവീന്ദ്രന്‍ നായരുടെ ഒരു സുഹൃത്തിനെ വിളിച്ചുവരുത്തിയാണ് ആശുപത്രിയില്‍ കൊണ്ടുപോയത്. ഇതില്‍ സംശയം തോന്നിയതോടെയാണ് കൂടുതല്‍ പരിശോധിച്ചത്. ജയമാധവന്‍ കട്ടിലില്‍ നിന്ന് വീണപ്പോള്‍ തലക്കേറ്റ പരിക്കാകാം മരണ കാരണമെന്നായിരുന്നു പോസ്റ്റ്‌മോര്‍ട്ടം റിപ്പോര്‍ട്ട്. ഈ പരുക്കുണ്ടായത് എങ്ങനെയെന്ന് സ്ഥിരീകരിക്കാന്‍ വീട്ടില്‍ നിന്ന് കണ്ടെത്തിയ രക്തക്കറ പുരണ്ട തടിക്കഷ്ണം ഉള്‍പ്പെടെ ഫോറന്‍സിക് പരിശോധനക്ക് വിധേയമാക്കിയതിലാണ് മരണത്തില്‍ അസ്വാഭാവികതയുണ്ടെന്ന് വ്യക്തമായത്. ജയമാധവൻനായരുടെ തല ചുവരിലിൽ ഇടിപ്പിച്ച് കൊലപ്പെടുത്തിയെന്നാണ് ക്രൈംബ്രാഞ്ചിന്‍റെ വിലയിരുത്തൽ.