എല്ലാം തുലച്ച്​ റോയി; നിലവിട്ട്​ ജോളി

കോഴിക്കോട്​: ഏറെ പണം മുടക്കി തുടങ്ങിയ ബിസിനസ്​ സംരംഭങ്ങളെല്ലാം തകർന്ന്​ അവസാന കാലത്ത്​ കടുത്ത സാമ്പത്തിക പ്രതിസന്ധിയിലായിരുന്നു റോയി​. മുക്കത്ത്​ റെഡിമെയ്​ഡ്​ കടയിൽ ഷെയറെടുത്തും താമരശ്ശേരി ചുങ്കത്ത്​ എൻജിൻ ഒായിൽ വ്യാപാരം നടത്തിയും ലക്ഷങ്ങളാണ്​ റോയി​ തുലച്ചത്​. ആർഭാടജീവിതവും സുഖലോലുപതയും റോയിയെ കൊണ്ടെത്തിച്ചത്​ കടുത്ത സാമ്പത്തിക പ്രതിസന്ധിയിൽ. ഇടക്ക്​ നടത്തിയ റിയൽ എസ്​റ്റേറ്റ്​ ബിസിനസും പൊട്ടി.

കുടുംബത്തിലെ സാമ്പത്തികകാര്യങ്ങൾ മാതാവ്​ അന്നമ്മയുടെ കൈകളിലായിരുന്നു. മാതാവി​​െൻറയും പിതാവി​​െൻറയും കൈയിൽനിന്ന്​ വൻ തുക റോയി പലപ്പോഴായി വാങ്ങി. പണം തിരിച്ച്​ ലഭിക്കാത്തതിനെ തുടർന്ന്​ അന്നമ്മ കണക്കു​ ചോദിക്കുന്നത്​ റോയിയെ ചൊടിപ്പിച്ചിരുന്നു. റോയിയുടെ ബിസിനസുകളെക്കുറിച്ചും സാമ്പത്തികത്തകർച്ചയെക്കുറിച്ചും ജോളിക്കും കൃത്യമായ ബോധ്യമുണ്ടായിരുന്നു. ​

േറായി വാങ്ങിയ പണം കൃത്യമായി അന്നമ്മ ഡയറിയിൽ എഴുതിസൂക്ഷിച്ചിരുന്നു. റോയി വാങ്ങിയ പണത്തെക്കുറിച്ച്​ ഭർത്താവിനോടും മറ്റു മക്കളോടും അന്നമ്മ പറഞ്ഞതോടെ റോയിക്കും ജോളിക്കും ഇവരോട്​ നീരസമുണ്ടായി. ഇതാണ്​ അന്നമ്മയെ വകവരുത്താൻ ഇടയാക്കിയതെന്നാണ്​ അന്വേഷണ സംഘത്തി​​െൻറ നിഗമനം.

അന്നമ്മയുടെ മരണശേഷം കുടുംബത്തി​​െൻറ സാമ്പത്തിക ഇടപാടുകൾ ടോം തോമസ്​ ഏറ്റെടുത്തു. കൂടത്തായിക്കടുത്ത മണിമുണ്ടയിൽ ടോം തോമസിനുണ്ടായിരുന്ന ഒന്നരയേക്കർ സ്​ഥലം വിറ്റ്​ ലഭിച്ച 18 ലക്ഷത്തോളം രൂപ റോയിയെ ഒഴിവാക്കി ജോളിയുടെ പേരിൽ ബാങ്കിൽ നിക്ഷേപിച്ചതായി കുടുംബവുമായി അടുത്ത ബന്ധുക്കൾ പറയുന്നു. കൂടുതൽ കുടുംബസ്വത്ത്​ ഇനി റോയിക്കും ഭാര്യക്കും ഉണ്ടാകില്ലെന്നും ടോം തോമസ്​ വ്യക്തമാക്കിയിരുന്നു. ഇതിലുള്ള നീരസമാവാം ടോം തോമസി​നെ വകവരുത്താൻ ജോളിയെ പ്രേരിപ്പിച്ചതെന്ന്​ കരുതുന്നു.

റോയി ജീവിച്ചിരുന്നാൽ ഉള്ളതെല്ലാം വിറ്റുതുലക്കുമെന്ന ആശങ്കയാവാം റോയിയെയും വകവരുത്താൻ ഇടയാക്കി​യതെന്ന്​ അന്വേഷണ സംഘം കരുതുന്നു. റോയി മരിച്ചപ്പോൾ പോസ്​റ്റ്​മോർട്ടം നടത്തണമെന്ന്​ നിർബന്ധിച്ചത്​ അമ്മാവനായ മഞ്ചാടിയിൽ മാത്യുവാണ്​. മാത്രമല്ല, ജോളിയുടെയും റോയിയുടെയും പല നടപടികളെയും ഇദ്ദേഹം എതിർത്തിരുന്നതായും സൂചനയുണ്ട്​. ഇതായിരിക്കാം മാത്യുവിനെ വകവരുത്താൻ വഴിവെച്ചതെന്ന നിഗമനത്തിലാണ്​ അന്വേഷണ സംഘം.

ആൽഫൈനെയും സിലിയെയും വകവരുത്തി ഷാജുവിനെ വിവാഹം കഴിക്കാൻ ജോളി നടത്തിയ നീക്കങ്ങൾ ദുരൂഹതകൾ നിറഞ്ഞതാണ്​. ഷാജുവി​​െൻറ കുടുംബവുമായി അടുത്ത ബന്ധമായിരുന്നു ജോളിക്കും റോയിക്കുമുണ്ടായിരുന്നത്​. ടോം തോമസ്​ അതിരുവിട്ട ഇൗ ബന്ധത്തിനെതിരെ രംഗത്തുവന്നു. ഷാജു കൂടത്തായിയിലെ വീട്ടിൽ വരുന്നത്​ ടോം തോമസ്​ തടഞ്ഞിരുന്നതായും അന്വേഷണ സംഘത്തിന്​ വിവരം ലഭിച്ചിരുന്നു.