കൊല്ലത്തെ ഫ്ലാറ്റിൽ ലഹരി പാർട്ടി; യുവതിയടക്കം മൂന്ന്​ പേർ പിടിയിൽ

കൊല്ലം: നഗരത്തിലെ ഫ്ലാറ്റ് കേന്ദ്രീകരിച്ച് മയക്കുമരുന്ന് പാർട്ടി നടത്തിയ യുവതിയുൾപ്പെടെയുള്ളവർ പിടിയിൽ. എക്​സൈസ്​ ഉദ്യോഗസ്ഥരെ കണ്ട്​ രക്ഷപ്പെടാനുള്ള ശ്രമത്തിനിടയിൽ ഫ്ലാറ്റി​െൻറ മൂന്നാം നിലയിൽ നിന്ന്​ വീണ്​ പരിക്കേറ്റ യുവാവുൾപ്പെടെ മൂന്ന്​ ​പേരെ ആണ്​ അറസ്​റ്റ്​ ചെയ്​തത്​. ഒരാൾ ഫ്ലാറ്റിൽനിന്ന്​ ചാടി രക്ഷപ്പെട്ടു. ഇയാളെയും ചേർത്ത്​ നാലുപേർക്കെതിരെ കേസെടുത്തു. ഇവരുടെ പക്കൽനിന്നും മാരക രാസമയക്കുമരുന്നായ എം.ഡി.എം.എ, കഞ്ചാവ്​ എന്നിവ കണ്ടെത്തി.

തഴുത്തല പേരയം മണിവീണ വീട്ടിൽ ഉമയനലൂർ ലീന(33), കിളികൊല്ലൂർ മാനവ നഗറിൽ നിന്നും ഇപ്പോൾ കിളികൊല്ലൂർ പ്രിയദർശിനി നഗറിൽ ആഷിയാന അപ്പാർട്ട്മെൻ്റിൽ താമസിക്കുന്ന ശ്രീജിത്( 27), ആശ്രാമം കാവടിപ്പുറം പുത്തൻ കണ്ടത്തിൽ വീട്ടിൽ ദീപു(26 ) എന്നിവരാണ്​ പിടിയിലായത്​. ദീപുവിനാണ് മൂന്നാം നിലയിൽ നിന്ന് വീണ് പരിക്കേറ്റത്​. ഇയാളിൽനിന്നാണ്​​ 0.1523 ഗ്രാം എം.ഡി.എം.എ പിടികൂടിയത്‌. എം.ഡി.എം.എയും കഞ്ചാവും കൈവശം വച്ചതിന് ഇയാൾക്കെതിരെ നേരത്തെയും കേസുണ്ട്. ലീന നഗരത്തിലെ പ്രധാന മയക്ക് മരുന്ന് ഏജൻറാണ്. ആശ്രാമം സൂര്യമുക്ക് സ്വദേശിയായ ക്യു.ഡി.സി എന്നു വിളിക്കുന്ന ദീപു( 28 ) എന്നയാളാണ് ഫ്ലാറ്റിൽ നിന്ന് ചാടി രക്ഷപെട്ടത്​. ഇയാൾ കൊലപാതക കേസിലും,നിരവധി ലഹരി മരുന്ന് കടത്ത്‌ കേസുകളിലും പ്രതിയാണ്​.

ബുധനാഴ്​ച വൈകിട്ട് കിളിക്കൊല്ലൂർ പ്രിയദർശിനി നഗറിലെ ആഷിയാന അപ്പാർട്ട്മെന്റിലെ ഒലിവ് എന്ന ഫ്ലാറ്റ് സമൂച്ചയത്തിന്റെ മൂന്നാം നിലയിലെ ഫ്ലാറ്റിൽ നിന്ന് പാട്ടും ബഹളവും അസഹ്യമായതോടെ പരിസരവാസികൾ പരാതിപ്പെടുകയായിരുന്നു. ശ്രീജിത് വാടകക്കെടുത്തതായിരുന്നു ഫ്ലാറ്റ്​. ലഹരിയിലായിരുന്ന യുവാക്കൾ സ്ഥലത്തെത്തിയ എക്സൈസുകാരെ ആക്രമിക്കാനും ശ്രമിച്ചു. രക്ഷ​െപടാനായി രണ്ടു യുവാക്കൾ ബാൽക്കണിയിൽ നിന്ന് താഴേക്ക് ചാടുകയായിരുന്നു. യുവാക്കൾ ഉപയോഗിച്ച സ്കൂട്ടറിൽ നിന്നും 20 ഗ്രാം കഞ്ചാവ്​ കണ്ടെത്തി.