അന്ന്​ 'പിത​​ൃശൂന്യരുടെ' പട്ടികയിൽ വീണ ജോർജ​ും; കോടിയേരിയുടെ പഴയ ഫേസ്​ബുക്​ പോസ്റ്റ്​ സമൂഹ മാധ്യമങ്ങളിൽ വൈറൽ

കോഴിക്കോട്​: രണ്ടാം പിണറായി വിജയൻ മന്ത്രിസഭയിൽ ആരോഗ്യ മന്ത്രിയായി വീണ ജോർജ്​ ചുമതലയേൽക്കാൻ മണിക്കൂറുകൾ മാത്രം ശേഷിക്കേ, അവർക്കെതിരെ ഒമ്പത്​ വർഷം മുമ്പ്​ മുതിർന്ന സി.പി.എം നേതാവ്​ കോടിയേരി ബാലകൃഷ്​ണൻ ഫേസ്​ബുക്കിൽ പങ്കുവെച്ച പോസ്റ്റ്​ കുത്തിപ്പൊക്കി നെറ്റിസൺസ്​. അന്ന്​ സി.പി.എമ്മിന്‍റെ യുവജന സംഘടനയായ ഡി.വൈ.എഫ്​.ഐ പുറത്തിറക്കിയ പോസ്റ്ററിൽ 'പിതൃശൂന്യർ' എന്ന്​ വിശേഷിപ്പിച്ചവരിൽ വീണ ജോർജ​ും ഉൾപ്പെട്ടിരുന്നു. ഈ പോസ്റ്റർ പങ്കുവെച്ചുള്ള കോടിയേരിയുടെ എഫ്​.ബി പോസ്റ്റാണ്​ ഇപ്പോൾ വ്യാപകമായി പ്രചരിക്കുന്നത്​.

2012 ജൂലൈ 29ലേതാണ്​ പോസ്റ്റ്​. ക്യാപ്റ്റന്‍ ലക്ഷ്മിയുടെ മരണവാര്‍ത്തയുമായി ബന്ധപ്പെട്ട് ഇന്ത്യവിഷന്‍ ചാനല്‍ സംപ്രേഷണം ചെയ്ത ഒരു ചിത്രത്തെ ചൊല്ലി ഉയർന്ന വിവാദത്തിന്‍റെ പശ്​ചാത്തലത്തിലായിരുന്നു ഇത്​. ക്യാപ്​റ്റൻ ലക്ഷ്​മിക്ക്​ വിട ചൊല്ലി ഇന്ത്യവിഷൻ നൽകിയ പോസ്റ്ററിലെ ഫോ​ട്ടോയിൽ അവരുടെ തൊപ്പിയിൽ സി.പി.എം എന്നെഴുതിയത്​ മായ്​ച്ചുകളഞ്ഞു എന്നാണ്​ വിവാദമുയർന്നത്​. ഇതിനെ വിമർശിച്ച്​ ഡി.വൈ.എഫ്.ഐ 'പിതൃശൂന്യർ' എന്ന തലക്കെട്ടിൽ പങ്കുവെച്ച പോസ്റ്ററിൽ അന്ന്​ ഇന്ത്യ വിഷനിൽ മാധ്യമപ്രവർത്തക ആയിരുന്ന വീണ ജോർജിന്‍റെ ചിത്രവും ഉൾപ്പെട്ടിട്ടുണ്ട്​. 'ഇത്രയും വേണോ സി.പി.എം വിരോധം. സഖാവ്​ ക്യാപ്​റ്റൻ ലക്ഷ്​മിയുടെ തൊപ്പിയിലെ സി.പി.എം എന്നെഴുതിയത്​ കമ്പ്യൂട്ടറിൽ മായ്​ച്​ കളഞ്ഞിരിക്കുന്നു. ലജ്​ജാവഹം' എന്നായിരുന്നു പോസ്റ്ററിലെ വാചകങ്ങൾ. വീണ ജോർജിനൊപ്പം അന്നത്തെ സഹപ്രവർത്തകരായ എം.പി. ബഷീർ, സനീഷ്​ ഇളയടത്ത്​ എന്നിവരുടെ ചിത്രങ്ങളും ചേർത്തിരുന്നു.

ഈ പോസ്റ്ററാണ്​ കോടിയേരി ബാലകൃഷ്​ണൻ ഫേസ്​ബുക്കിൽ പങ്കുവെച്ചത്​. ന്യൂസ്​റൂമിലെ കാപട്യങ്ങൾക്ക്​ രക്​തസാക്ഷികളുടെ പിന്മുറക്കാർ മറുപടി ചോദിക്കുമെന്നും അന്ന്​ നിഷ്​പക്ഷ മാധ്യമ ധർമ്മത്തെ പറ്റി ചാരിത്ര്യ പ്രസംഗം നടത്തിയാൽ മാപ്പ്​ കിട്ടില്ലെന്നുമാണ്​ കോടിയേരി എഴുതിയത്​. എന്നിട്ട്​ അതേ ആ​ൾക്ക്​ മന്ത്രിസ്​ഥാനം നൽകേണ്ടി വന്നതിനെ കളിയാക്കിയാണ്​ ​എഫ്​.ബി പോസ്റ്റിന്‍റെ സ്​ക്രീൻ ഷോട്ടുകൾ വ്യാപകമായി പ്രചരിക്കുന്നത്​.

കോടിയേരി ബാലകൃഷ്​ണന്‍റെ എഫ്​.ബി പോസ്റ്റിന്‍റെ പൂർണരൂപം-

നിങ്ങൾ തുടച്ചുമാറ്റാൻ ശ്രമിക്കുന്നതെന്തെന്ന്​ ഇപ്പോൾ വ്യക്​തമായി. തൊപ്പിയിലെ ചിഹ്നങ്ങൾ നിങ്ങൾക്ക്​ മായ്​ക്കാൻ കഴിയും. പക്ഷേ, ഞങ്ങളുടെ കൊടി ചുവന്നത്​ രക്​തം കൊണ്ടാണ്​. രക്​തത്തിൽ അലിഞ്ഞുചേർന്നത്​ കമ്യൂണിസവും. ഓർത്താൽ നന്ന്​. ന്യൂസ്​റൂമിലെ കാപട്യങ്ങൾക്ക്​ മറുപടി രക്​തസാക്ഷികളുടെ പിന്മുറക്കാർ ഞങ്ങൾ ചോദിക്കുക തന്നെ ചെയ്യും. അന്ന്​ നിഷ്​പക്ഷ മാധ്യമ ധർമ്മത്തെ പറ്റി ചാരിത്ര്യ പ്രസംഗം നടത്തരുത്​. മാപ്പ്​ കിട്ടില്ല.