​കോടിയേരിയെ വിദഗ്​ധ ചികിത്സക്കായി ചെന്നൈയിലെത്തിച്ചു

തിരുവനന്തപുരം: ആരോഗ്യപ്രശ്നം കാരണം സി.പി.എം സംസ്ഥാന സെക്രട്ടറി പദവിയൊഴിഞ്ഞ പോളിറ്റ്​ ബ്യൂറോം അംഗം കോടിയേരി ബാലകൃഷ്ണനെ വിദഗ്ധ ചികിത്സക്കായി ചെന്നൈ അപ്പോളോ ആശുപത്രിയിലെത്തിച്ചു. ഭാര്യ വിനോദിനി ബാലകൃഷ്ണനും മകൻ ബിനീഷ്​ കോടിയേരിയും തിരുവനന്തപുര​ത്തെ സ്വകാര്യ ആശുപത്രിയിലെ ഡോക്ടറും ഒപ്പമുണ്ട്.

രാവിലെ പത്തരയോടെ എ.കെ.ജി സെന്‍ററിന്​ തൊട്ടടുത്തുള്ള താമസസ്ഥലത്തുനിന്ന് ആംബുലൻസിലാണ് വിമാനത്താവളത്തിലേക്ക്​ പോയത്. തുടർന്ന് പതിനൊന്നരയോടെ പ്രത്യേക എയർ ആംബുലൻസിൽ ചെന്നൈയിലേക്ക്​.

കോടിയേരിയെ കാണാൻ മുഖ്യമന്ത്രി പിണറായി വിജയനും ഭാര്യയും മകളുമെത്തിയിരുന്നു. സി.പി.എം സംസ്ഥാന സെക്രട്ടറി എം.വി. ഗോവിന്ദൻ, പോളിറ്റ്​ ബ്യൂറോ അംഗം എം.എ. ബേബി, മന്ത്രി കെ.എൻ. ബാലഗോപാൽ, എ.കെ. ബാലൻ, പി. ജയരാജൻ, എം. വിജയകുമാർ, ടി.പി. രാമകൃഷ്ണൻ തുടങ്ങിയവരും കോടിയേരിയെ സന്ദർശിച്ചു. അപ്പോളോയിൽനിന്നുള്ള മെഡിക്കൽ സംഘം ഞായറാഴ്ച തലസ്ഥാനത്തെത്തിയിരുന്നു.