ജലീലിനെ വിളിപ്പിച്ചത്​ സാക്ഷിയായി; ഖുർആൻ നൽകുന്നത്​​ നിയമവിരുദ്ധമാണോയെന്ന്​ കോടിയേരി

തിരുവനന്തപുരം: ദേശീയ അന്വേഷണ ഏജൻസി മന്ത്രി കെ.ടി ജലീലിനെ വിളിപ്പിച്ചത്​ സാക്ഷിയെന്ന നിലയിലാണെന്നും അദ്ദേഹത്തിന്​ നൽകിയ നോട്ടീസിൽ അത്​ വ്യക്തമാണെന്നും സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ണൻ. സ്വർണക്കടത്തു കേസുമായി ബന്ധപ്പെട്ട വിവരങ്ങൾ ചോദിച്ചറിയാനാണ്​ ജലീലിനെ വിളിപ്പിച്ചത്​. ഇതി​െൻറ പേരിൽ എന്തു സമരം നടന്നാലും ജലീൽ രാജിവെക്കാൻ പോകുന്നില്ല. മുഖ്യമന്ത്രിയായിരുന്ന ഉമ്മൻചാണ്ടി പതിനാല് മണിക്കൂർ ജുഡീഷ്യൽ കമീഷന് മുന്നിലിരുന്നു. അന്ന്​ അദ്ദേഹം മുഖ്യമന്ത്രി രാജിവെച്ചിരുന്നെങ്കിൽ ധാർമ്മികത മുൻനിർത്തിയുള്ള ചോദ്യങ്ങൾക്ക്​ അർത്ഥമുണ്ടാകുമായിരുന്നുവെന്നും കോടിയേരി വ്യക്തമാക്കി. എ.കെ.ജി സെൻററിൽ നടന്ന സി.പി.എം സംസ്ഥാന സെക്രട്ടറിയേറ്റ്​ യോഗത്തിന്​ ശേഷം മാധ്യമങ്ങളുമായി സംസാരിക്കുകയായിരുന്നു അദ്ദേഹം.

സർക്കാരിനെ ഇകഴ്ത്താൻ പ്രതിപക്ഷം ഖുർആനെ രാഷ്ട്രീയ ആയുധമാക്കുന്നെന്ന ആരോപണവും കോടിയേരി ഉയർത്തി. ഖുർആൻ ജലീൽ ചോദിച്ചു വാങ്ങിയതല്ല. ഖുർആൻ ഇന്ത്യയിൽ നിരോധിച്ച പുസ്​തകമാണോ? ഖുർആൻ നൽകുന്നത്​ നിയമവിരുദ്ധമാണോ? ആർ.എസ്​.എസി​െൻറ പ്രചരണത്തിൽ കോൺഗ്രസും ഒപ്പം ചേർന്നു. ഖുർആൻ വിതരണം ചെയ്​തുവെന്ന ബി.ജെ.പിയുടെ ആരോപണം മുസ്​ലിം ലീഗ്​ ഏറ്റുപിടിക്കുന്നത്​ എന്തിനാണെന്നും കോടിയേരി ചോദിച്ചു.

കോൺഗ്രസും മുസ്​ലിം ലീഗും ബി.ജെ.പിയുമായി സന്ധിചെയ്യുന്നു. പി.കെ കുഞ്ഞാലിക്കുട്ടി പോലും ബി.ജെ.പിയെ തള്ളിപ്പറയാൻ തയാറാകുന്നില്ല. ബി.ജെ.പി എങ്ങനെയാണ്​ മുസ്​ലിം ലീഗി​െൻറ ശത്രുവല്ലാതായത്​. മുസ്​ലിംകളും മതന്യൂനപക്ഷങ്ങളും ഈ നിലപാട്​ പരിശോധിക്കണം. കോൺഗ്രസിനും യു.ഡി.എഫിനും ബി.ജെ.പിയുമായി ഉള്ള ബന്ധം പെട്ടെന്ന് ഉണ്ടാകുന്നതല്ലെന്നും കോടിയേരി പറഞ്ഞു.

സര്‍ക്കാരിനെ അട്ടിമറിക്കാൻ ആസൂത്രിത നീക്കം നടക്കുകയാണ്​. സമരങ്ങൾക്ക്​ ജനപിന്തുണ ഇല്ല. ഓരോ ദിവസവും സമരക്കാര്‍ ഒറ്റപ്പെടുന്നു. ഗുണ്ടകളെ റിക്രൂട്ട് ചെയ്താണ് കോൺഗ്രസും ബി.ജെ.പിയും സമരം നയിക്കുന്നത്. തിരുവനന്തപുരത്ത് ഗുണ്ടാ സംഘങ്ങൾ ഒത്ത് ചേര്‍ന്ന പോലെ സംസ്ഥാനത്തെല്ലായിടത്തും നടക്കുന്നു.

മന്ത്രിമാരെ കൊലപ്പെടുത്താനാണ് ശ്രമിക്കുന്നത്. ജലീലിനെ അപായപ്പെടുത്താൻ ശ്രമം നടന്നു. എ.കെ ബാല​െൻറ വാഹനത്തിന് നേരെ ഏറ് പടക്കം എറിഞ്ഞതും ഇതി​െൻറ ഭാഗമായാണ്. ഇത് ആസൂത്രിതമായ അട്ടിമറി സമരമാണ്. ഇത് ജനങ്ങളെ അണിനിരത്തി തന്നെ ചെറുക്കാനാണ് ഇടത് മുന്നണിയുടെ ശ്രമം. ജനപിന്തുണയുള്ളതിനാൽ സർക്കാറിന്​ ഭയമില്ലെന്നും കോടിയേരി പറഞ്ഞു.