ബ്രഹ്മപുരത്ത്​ ഇനിയും തീപിടിത്തമുണ്ടാകാമെന്ന്​ കൊച്ചി മേയർ

കൊച്ചി: ബ്രഹ്മപുരത്ത്​ ഇനിയും തീപിടിത്തമുണ്ടാകാമെന്ന്​ കൊച്ചി മേയർ എം. അനിൽകുമാർ. ജൈവമാലിന്യം വൻതോതിലാണ്​ അവിടെ കിടക്കുന്നത്​. അതിൽനിന്ന്​ മീഥെയിൽ ഉൽപാദിപ്പിക്കപ്പെടുന്നുണ്ട്​. അത്​ തീപിടിത്തത്തിന്​ കാരണമാകും. ബയോമൈനിങ്​ നടത്തി ജൈവമാലിന്യവും പ്ലാസ്റ്റിക്കും മറ്റ്​ അജൈവമാലിന്യവും ​വേർതിരിച്ച്​ സംസ്കരിക്കലാണ്​ പരിഹാരം. അതിന്​ സമയമെടുക്കുമെന്നും മേയർ പറഞ്ഞു.

ബയോമൈനിങ്​ പൂർത്തിയായാൽ വീണ്ടും ബ്രഹ്മപുരം മാലിന്യക്കളമാകില്ല. ഇനി അവിടേക്ക്​ മാലിന്യം കൊണ്ടുപോകില്ല. പകരം പൂന്തോട്ടവും പാർക്കും മറ്റും നിർമിച്ച്​ ബ്രഹ്മപുരത്തുകാർക്ക്​ അഭിമാനിക്കാൻ കഴിയുന്ന ഇടമാക്കി മാറ്റും.

മാലിന്യ സംസ്കരണത്തിൽ സംസ്ഥാന സർക്കാറിന്​ പങ്കാളിത്തമുണ്ടാകണം. കോർപറേഷന്​ ഒറ്റക്ക്​ ചെയ്യാൻ കഴിയില്ല. പ്ലാന്‍റ്​ സ്ഥാപിക്കുന്നതിന്​ ആവശ്യമായ ഭൂമി സർക്കാർ തിരിച്ചെടുക്കാൻ മുഖ്യമന്ത്രി നിർദേശിച്ചിട്ടുണ്ട്​. കോർപറേഷന്​ ഇത്രയും സ്ഥലം ആവശ്യമില്ല. സർക്കാർ പ്ലാന്‍റ്​ വന്നുകഴിഞ്ഞാൽ മികച്ച ഗ്രീൻ പാർക്ക്​ ഉണ്ടാക്കാൻ കഴിയുമെന്നും മേയർ പറഞ്ഞു.