മറ്റ് സംസ്ഥാനങ്ങളെ അപേക്ഷിച്ച്​ കേരളത്തിൽ നികുതി കുറവ്​; ഇന്ധന വില കുറക്കാനാകില്ല -ധനമന്ത്രി

തിരുവനന്തപുരം: നിയമസഭയിലും കത്തി ഇന്ധന വില വർധന​. സംസ്ഥാനത്ത്​ നികുതി കൊള്ളയാണ് നടക്കുന്നതെന്നും ഇന്ധന വിലക്ക്​ സംസ്ഥാനം സബ്സിഡിയെങ്കിലും നൽകണമെന്നും പ്രതിപക്ഷ നേതാവ് വി.ഡി സതീശൻ പറഞ്ഞു. എന്നാൽ സംസ്ഥാനത്ത് ഇന്ധന നികുതി കുറയ്ക്കാനാകില്ലെന്ന് ധനമന്ത്രി കെ.എൻ ബാലഗോപാൽ അറിയിച്ചു.

മറ്റ് സംസ്ഥാനങ്ങളെ അപേക്ഷിച്ച് കേരളത്തിൽ നികുതി കുറവാണെന്നും പ്രതിപക്ഷം നൽകിയ അടിയന്തര പ്രമേയ നോട്ടീസിന് ധനമന്ത്രി മറുപടി നൽകി. എന്നാൽ അടിയന്തര പ്രമേയത്തിന് അനുമതി നിഷേധിച്ചതിനെ തുടർന്ന് പ്രതിപക്ഷം സഭയിൽ നിന്ന് ഇറങ്ങിപോയി. മുസ്‌ലിം ലീഗിലെ എന്‍. ശംസുദ്ദീനാണ് നോട്ടിസ് നല്‍കിയത്.

പ്രതിപക്ഷത്തിന്‍റെ അടിയന്തിര പ്രമേയത്തിൽ ബി.ജെ.പിക്കെതിരെ ഒന്നും പറയുന്നില്ല. പെട്രോൾ വില വർധിപ്പിക്കുന്നത്​ കേന്ദ്ര സർക്കാറാണ്​. ഇന്ധന വില ജി.എസ്ടി.യില്‍ കൊണ്ടുവരില്ല. സംസ്ഥാനത്തിന് ആകെ വരുമാനം മദ്യം, ഇന്ധന വില എന്നിവയില്‍ നിന്നാണ്. സംസ്ഥാനത്തിന് വരുമാനം വേണ്ടെന്ന് പറയുന്നത് ആരെ സഹായിക്കാനാണെന്നും ധനമന്ത്രി ചോദിച്ചു. പെട്രോള്‍, ഡീസല്‍ വില ഇന്ധന വില നിയന്ത്രണം എടുത്തുകളഞ്ഞത് യു.പി.എ സര്‍ക്കാരാണ്. മോദി സര്‍ക്കാര്‍ അതു പിന്തുടര്‍ന്നു. ഇടതുപക്ഷം അതിനെ എതിര്‍ത്തപ്പോഴും കോണ്‍ഗ്രസ് പാര്‍ലമെന്റില്‍ ഒന്നും പറഞ്ഞില്ല -​ധനമന്ത്രി ചൂണ്ടിക്കാട്ടി.