രാജ്യസഭ തെരഞ്ഞെടുപ്പ്​: വിട്ടുനിൽക്കാൻ​ കേരള കോൺഗ്രസ്​ എം തീരുമാനം

കോട്ടയം: രാജ്യസഭ തെരഞ്ഞെടുപ്പിൽനിന്ന്​ വിട്ടുനിൽക്കാൻ​ കേരള കോൺഗ്രസ്​ എം തീരുമാനിച്ചു.  മുന്നണി പ്ര​വേശനത്തിൽ തീരുമാനമാകാത്തതിനാൽ ഇരുമുന്നണി സ്ഥാർഥികൾക്കും വോട്ട്​ ചെയ്യേണ്ടെന്ന്​ ഞായറാഴ്​ച കോട്ടയത്ത്​ ചേർന്ന പാർട്ടി സ്​റ്റിയറിങ്​ കമ്മിറ്റി യോഗം ധാരണയിലെത്തുകയായിരുന്നു. എന്നാൽ,  മുന്നണി പ്രവേശനത്തെച്ചൊല്ലി കടുത്ത ഭിന്നത തുടരുന്നതിനാൽ ചെങ്ങന്നൂർ ഉപതെരഞ്ഞെടുപ്പിലെ തീരുമാനം നീട്ടി. ​ഉന്നതാധികാര സമിതി യോഗത്തിലും തുടർന്ന്​ നടന്ന സ്​റ്റിയറിങ്​ കമ്മിറ്റിയിലും ഇടതുബന്ധത്തെ ശക്തമായ എതിർത്ത ​പി.ജെ. ജോസഫി​​​​െൻറ നിലപാടിന്​ കൂടുതൽ സ്വീകാര്യത ലഭിച്ചതോ​െടയാണ്​ ചെങ്ങന്നൂരിലെ പിന്തുണയുടെ കാര്യത്തിൽ തീരുമാനം മാറ്റിയതെന്നാണ്​ വിവരം.  

ഒരു മുന്നണിയുടെയും ഭാഗമല്ലാത്തതിനാലാണ്​ രാജ്യസഭ ​െതരഞ്ഞെടുപ്പിൽനിന്ന്​ വിട്ടുനിൽക്കാൻ തീരുമാനിച്ചതെന്ന്​ യോഗത്തിനുശേഷം പാർട്ടി ചെയർമാൻ കെ.എം. മാണി മാധ്യമങ്ങ​േളാട്​ പറഞ്ഞു. മുന്നണി പ്രവേശനം  ചെങ്ങന്നൂർ ഉപതെരഞ്ഞെടുപ്പിന​ുമുമ്പ്​ പ്രഖ്യാപിക്കുമെന്നും അദ്ദേഹം വ്യക്തമാക്കി. എല്ലാവർക്കും ഒരു ‘സർപ്രൈസ്’ ആയി മുന്നണി പ്രവേശനം ഉണ്ടാകും. ഉപതെരഞ്ഞെടുപ്പിനു മുമ്പ്​ പാർട്ടിയുടെ തെരഞ്ഞെടുപ്പുനയം പ്രഖ്യാപിക്കുമെന്നും അദ്ദേഹം പറഞ്ഞു. ഉപതെരഞ്ഞെടുപ്പിലെ നിലപാട് വിജ്ഞാപനം വന്ന ശേഷം തീരുമാനിക്കും. ഇതിൻ മേൽ ഇപ്പോൾ ചർച്ച നടന്നില്ല. സംസ്ഥാന^കേന്ദ്ര സർക്കാറുകൾ കാർഷിക മേഖലയെ പരിഗണിക്കുന്നതിൽ പരാജയമാണ്. മദ്യത്തിൽ സർക്കാറെടുക്കുന്ന തീരുമാനങ്ങൾ അംഗീകരിക്കാനാകില്ലെന്നും മാണി പറഞ്ഞു. 

നേരത്തേ സ്​റ്റിയറിങ്​ കമ്മിറ്റി യോഗത്തിൽ എൽ.ഡി.എഫിനൊപ്പം നിൽക്കണമെന്നും യു.ഡി.എഫിലേക്ക്​ മടങ്ങണമെന്നും ഇരുവിഭാഗമായി തിരിഞ്ഞ്​ നേതാക്കൾ ആവശ്യപ്പെട്ടു. കെ.എം. മാണിയെ അനുകൂലിക്കുന്നവർ ഇടത്​ അനുഭാവം പ്രകടിപ്പിച്ചപ്പോൾ ജോസഫിനെ അനുകൂലിക്കുന്നവർ യു.ഡി.എഫിലേക്ക്​ മടങ്ങണമെന്ന ആവശ്യം ഉയർത്തി. ഒരുകൂട്ടം നേതാക്കൾ മുന്നണി പ്രവേശനത്തിലെ ആശയക്കുഴപ്പം നീക്കണമെന്നും ആവശ്യപ്പെട്ടു. 
ഒരു മുന്നണിയുടെയും ഭാഗമല്ലാത്തതിനാൽ ചെങ്ങന്നൂരിൽ ഏതെങ്കിലും ഒരു സ്ഥാനാർഥിയെ പിന്തുണക്കുന്നത്​ അംഗീകരിക്കാനാവി​ല്ലെന്ന്​ ജോസഫ്​ വിഭാഗം ​വ്യക്തമാക്കി. എന്നാൽ, മാണിയെ അനുകൂലിക്കുന്നവർ ഇനി യു.ഡി.എഫ്​ പാളയത്തിലേക്ക്​ മടങ്ങുന്നത്​ ചിന്തിക്കരുതെന്ന്​ ആവശ്യപ്പെട്ടു. ഭിന്നത കടുത്തതോടെ വിജ്ഞാപനം വന്നിട്ടില്ലാത്തതിനാൽ  ചെങ്ങന്നൂരിൽ നിലപാട്​ പിന്നീട്​ എടുക്കാമെന്ന്​ കെ.എം. മാണി പറഞ്ഞു. ഡെപ്യൂട്ടി ചെയർമാൻ സി.എഫ്. തോമസ്, വൈസ് ചെയർമാൻ ജോസ് കെ. മാണി എം.പി, മോൻസ് ജോസഫ് എം.എൽ.എ എന്നിവരും പങ്കെടുത്തു.