കോവിഡിൽ ജനം കടുത്ത പ്രതിസന്ധിയിൽ; സർക്കാർ ഉടൻ ഇടപെടണം -കെ.കെ.ശൈലജ

തിരുവനന്തപുരം: കോവിഡിനെ തുടർന്ന് ജനങ്ങൾ കടുത്ത പ്രതിസന്ധിയിലാണെന്ന്​ നിയമസഭയിൽ തുറന്നുപറഞ്ഞ്​ മുൻമന്ത്രി കെ.കെ. ശൈലജ. ചെറുകിട ഇടത്തരം വ്യവസായ വ്യാപാര മേഖലയിലുള്ളവരാണ് കൂടുതൽ ബുദ്ധിമുട്ടുന്നത്​. ലൈറ്റ് ആൻഡ്​ സൗണ്ട് മേഖലയിലെ ജീവനക്കാർ പട്ടിണിയിലാകുന്നു. ഈ വിഷയത്തിൽ സർക്കാറി​െൻറ ശ്രദ്ധ അടിയന്തരമായി പതിയണം. പാവപ്പെട്ട തൊഴിലാളികൾക്കും പാക്കേജ് പ്രഖ്യാപിക്കണം. പലിശ രഹിത വായ്പയോ, പലിശ കുറഞ്ഞ വായ്പയോ നൽകണമെന്നും ശ്രദ്ധ ക്ഷണിക്കലിൽ ശൈലജ ആവശ്യപ്പെട്ടു.

കോവിഡും ലോക്​ഡൗണും പ്രതിസന്ധി സൃഷ്​ടിച്ചപ്പോഴും കേരള ഖാദി ഗ്രാമ വ്യവസായ ബോര്‍ഡ്, ഖാദി ഉൽപാദന കേന്ദ്രങ്ങള്‍ കഴിവതും മാനദണ്ഡങ്ങള്‍ പാലിച്ച്​ തുറന്നുപ്രവര്‍ത്തിപ്പിക്കാനും തൊഴിലാളികള്‍ക്ക് തൊഴില്‍ നല്‍കാനും ശ്രമിച്ചുവരുന്നതായി മന്ത്രി പി. രാജീവ്​ മറുപടി നൽകി. ഓണക്കാലത്ത് കൈത്തറി ചലഞ്ച് എന്ന പേരിൽ പ്രത്യേക കാമ്പയിൻ സംഘടിപ്പിക്കും. 5000 രൂപയുടെ തുണിത്തരങ്ങൾ 2999 രൂപക്ക് വിൽക്കുന്ന സ്കീം ഓണത്തോടനുബന്ധിച്ച് ആവിഷ്കരിച്ചിട്ടുണ്ടെന്നും മന്ത്രി പറഞ്ഞു.

കോവിഡി​െൻറ പശ്ചാത്തലത്തില്‍ ദിനേശ് ബീഡി സംഘത്തിലെ ആകെയുള്ള 4000 തൊഴിലാളികള്‍ക്ക് രണ്ടുവര്‍ഷത്തേക്ക്​ 2,59,668 തൊഴില്‍ ദിനങ്ങള്‍ നഷ്​ടപ്പെടുകയും, കൂലിയിനത്തില്‍ 7.73 കോടി രൂപയുടെ വരുമാന നഷ്​ടം സംഭവിക്കുകയും ചെയ്തു. ബീഡി തൊഴിലാളികളുടെ ഉന്നമനത്തിനുവേണ്ടി സമര്‍പ്പിച്ച പദ്ധതികള്‍ക്ക്​ അഞ്ചുകോടി രൂപയുടെ ഭരണാനുമതിയായിട്ടുണ്ടെന്നും മന്ത്രി കൂട്ടിച്ചേർത്തു.