വടകരയിൽ കെ.കെ രമ

കോഴിക്കോട്​: വടകരയിൽ ആർ.എം.പി സ്ഥാനാർഥിയായി കെ.കെ രമ മത്സരിക്കുമെന്ന്​ സംസ്ഥാന സെക്രട്ടറി എൻ.​വേണു അറിയിച്ചു. ദിവസങ്ങൾ നീണ്ട അഭ്യൂഹങ്ങൾക്കൊടുവിലാണ്​ സ്ഥാനാർഥി പ്രഖ്യാപനം നടത്തിയത്​. യു.ഡി.എഫ്​ രമക്ക്​ പൂർണപിന്തുണ നൽകുമെന്ന്​ വേണു വ്യക്​തമാക്കി.

ദിവസ​ങ്ങളോളം നീണ്ട്​ നിന്ന അനിശ്ചിതത്വത്തിനും ആശയക്കുഴപ്പത്തിനുമൊടുവിലാണ്​ രമയുടെ സ്ഥാനാർഥിത്വം പ്രഖ്യാപിക്കപ്പെടുന്നത്​. യു.ഡി.എഫ് നേതൃത്വത്തിലും വലിയ തോതിൽ ആശയക്കുഴപ്പം നിലനിന്നിരുന്നു. രമ മത്സരിക്കില്ലെന്നും വടകരയിൽ കോൺഗ്രസ് സ്ഥാനാർഥിയെ നിർത്തുമെന്നാണ്​ ഇന്നലെ യു.ഡി.എഫ് കൺവീനർ എം.എം. ഹസൻ പറഞ്ഞത്​. എന്നാൽ രമ മത്സരിക്കുമെന്നും യു.ഡി.എഫ് പിന്തുണക്കുമെന്നുമാണ് പ്രതിപക്ഷ നേതാവ് രമേശ് ചെന്നിത്തലയുടെ നിലപാട്​.

ഇതിനിടയിൽ രമക്ക് പകരം ആർ.എം.പി(ഐ) നേതാവ് എൻ. വേണു വടകരയിൽ മത്സരിക്കുമെന്നും വാർത്തകൾ ഉണ്ടായിരുന്നു.​ അങ്ങനെയാണെങ്കിൽ കോൺഗ്രസ് സ്വന്തം സ്ഥാനാർഥിയെ നിർത്തുന്നതിനെ കുറിച്ചും​ ആലോചിച്ചിരുന്നു. കെ.കെ. രമക്ക്​ വിജയ സാധ്യതയുള്ളതിനാലാണ്​ അവർ മത്സരിച്ചാൽ പിന്തുണക്കാമെന്ന്​ ​കോൺഗ്രസ്​ നിലപാട്​ സ്വീകരിച്ചത്​.

2016ൽ വടകരയിൽ ഒറ്റക്ക് മത്സരിച്ച കെ.കെ. രമ 20,504 വോട്ട് നേടിയിരുന്നു. പതിനായിരത്തിൽ താഴെ വോട്ടിനാണ് അന്ന് എൽ.ഡി.എഫ് സ്ഥാനാർഥിയായ ജെ.ഡി.എസ് നേതാവ് സി.കെ.നാണു വിജയിച്ചത്.