കിരൺ ക്രൂരപീഡനം തുടങ്ങിയത്​ കാർ ഇഷ്​ടപ്പെടാത്തതിനാൽ; മകളെ കൊന്നതെന്ന്​ മാതാപിതാക്കൾ

കടയ്ക്കൽ (തിരുവനന്തപുരം): ശാസ്താംകോട്ടയിൽ ഭർതൃഗൃഹത്തിൽ യുവതിയെ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ കൊലപാതക ആരോപണവുമായി മാതാപിതാക്കൾ​. വിസ്മയ ആത്മഹത്യ ചെയ്യില്ലെന്നും കൊന്നതാണെന്നും പിതാവ് ത്രിവിക്രമൻ നായർ ആരോപിച്ചു. വിസ്​മയയെ കിരൺ നിരന്തരം മർദിച്ചിരുന്നതായി മാതാവ് സജിതയും കുറ്റപ്പെടുത്തി​. എന്നാൽ പഠനം, ജോലി എന്നിവയുമായി മുന്നോട്ടുപോകാനായിരുന്നു മകളുടെ തീരുമാനം. ഇതിനിടയിലാണ്​ മരണവാർത്ത വരുന്ന​െതന്നും മാതാവ്​ പറഞ്ഞു. കിരണിന്‍റെ അറസ്റ്റ്​ ഇന്ന്​ രേഖപ്പെടുത്തു​െമന്നാണ്​ വിവരം.

100 പവൻ സ്വർണവും ഒന്നേകാൽ ഏക്കർ സ്ഥലവും പത്ത് ലക്ഷം രൂപ വിലവരുന്ന കാറുമായിരുന്നു സ്ത്രീധനമായി നൽകിയത്. ഭർത്താവ് കിരണിന് കാർ ഇഷ്​ടപ്പെടാതെ വന്നതോടെയാണ് ക്രൂരപീഡനം തുടങ്ങിയതെന്ന് പിതാവ് പറയുന്നു.

മർദനം സംബന്ധിച്ച്​ ഞായറാഴ്ച വിസ്മയ ബന്ധുക്കൾക്ക് വാട്സ്​ആപ് സന്ദേശം അയച്ചിരുന്നു. പരിക്കി​ൻെറ ദൃശ്യങ്ങളും ബന്ധുക്കൾക്ക് കൈമാറി. ക്രൂരമർദനമാണ്​ ഭർത്താവിൽനിന്ന്​ നേരിടേണ്ടി വന്നതെന്ന് ചാറ്റിൽ വ്യക്തമാക്കിയിരുന്നു.

'ദേഷ്യം വന്നാൽ അയാൾ എന്നെ അടിക്കും. അയാൾക്കുകൊടുത്ത വണ്ടി കൊള്ളില്ലെന്ന്​ പറഞ്ഞ് കഴിഞ്ഞദിവസം തെറി വിളിച്ചു. അച്ഛനെയും ചീത്ത വിളിച്ചു. കുറേ നേരം സഹിച്ചിരുന്നു. സഹികെട്ട് മുറിയിൽനിന്ന് ഇറങ്ങിപ്പോകാൻ നോക്കിയപ്പോ മുടിയിൽ പിടിച്ചുവലിച്ച് പലതവണ അടിച്ചു. അടികൊണ്ടു വീണ എൻെറ മുഖത്ത് ചവിട്ടി, കാലുകൊണ്ട് മുഖത്ത് അമർത്തി' വിസ്മയ വാട്സ്​ആപ് ചാറ്റിൽ പറഞ്ഞത്രെ.

മുഖത്തും കൈകളിലും മുറിവേറ്റതി​ൻെറ പാടുകളും അടികൊണ്ട്​ നീലിച്ചതിൻെറ പാടുകളടക്കമുള്ള ചിത്രങ്ങളും അയച്ചെന്ന്​ ബന്ധുക്കൾ പറയുന്നു. 2020 മേയ് 31നാണ് നിലമേൽ കൈതോട് കുളത്തിൻകര മേലേതിൽ പുത്തൻവീട്ടിൽ ത്രിവിക്രമൻ നായരുടെയും സജിതയുടെയും മകൾ എസ്.വി. വിസ്മയയെ ശൂരനാട് പോരുവഴി അമ്പലത്തുഭാഗം ചന്ദ്രവിലാസത്തിൽ എസ്. കിരൺകുമാർ വിവാഹം കഴിച്ചത്.

മഴയത്ത് കാറിൽനിന്ന്​ പകർത്തിയതെന്നുകരുതുന്ന വിഡിയോയാണ് വിസ്മയ അവസാനമായി ഫേസ്​ബുക്കിൽ പോസ്​റ്റ്​ ചെയ്തത്. ജൂൺ എട്ടിനാണ് മഴയത്ത് കാറിൽ നിന്ന് പകർത്തിയ വിഡിയോ പോസ്​റ്റ്​ ചെയ്തത്. ഭർത്താവ് കിരൺകുമാറിനെ ടാഗ് ചെയ്തിട്ടുമുണ്ട്.

ദിവസങ്ങൾക്ക് മുമ്പ് ഭർത്താവിനൊപ്പമുള്ള ചിത്രം പ്രൊഫൈൽ ഫോട്ടോയായി ചേർത്തിട്ടുണ്ട്. മഴ വിഡിയോക്ക്​ താഴെ അനുശോചന സന്ദേശങ്ങളുടെ പ്രവാഹമാണ്. ഭർത്താവ് കിരൺകുമാറിനെതിരെ നിരവധിപേർ രോഷപ്രകടനവും നടത്തിയിട്ടുണ്ട്.