നീനുവിന്​ മാനസിക രോഗമുണ്ടെന്ന്​ ആവർത്തിച്ച്​ മാതാവ്​ രഹ്​ന

കോട്ടയം: പ്രണയവിവാഹത്തെ തുടർന്ന്​ കൊല്ലപ്പെട്ട കെവി​​​െൻറ ഭാര്യ നീനുവിന് മാനസിക രോഗമുണ്ടെന്ന നിലപാടിൽ ഉറച്ച്​ മാതാവ്​ രഹ്​ന ചാക്കോ. മകൾ മാനസിക രോഗിയാണെന്നും ചികിത്സിച്ചിട്ടുണ്ടെന്നും അവർ മാധ്യമങ്ങളോട്​ പറഞ്ഞു. അതിനിടെ കോടതി നിർദേശപ്രകാരം രഹ‍്‍നയെ അടുത്തയാഴ്​ച വീണ്ടും ചോദ്യംചെയ്യുമെന്ന്​ ജില്ല പൊലീസ്​ മേധാവി ഹരിശങ്കർ അറിയിച്ചു. 

കഴിഞ്ഞയാഴ്​ച ഹാജരാകാൻ നിർദേശിച്ചിരുന്നു. എന്നാൽ, ഭർതൃസഹോദര​​​െൻറ മർദനമേറ്റ്​ അവർ ചികിത്സയിലായിരുന്നതിനാൽ അടുത്തയാഴ്​ച വരാൻ നിർദേശിച്ചിട്ടുണ്ട്​. അമ്മ എന്ന നിലയില്‍ അവളുടെ കാര്യം തനിക്ക്​ മാത്രമേ അറിയൂവെന്നും രഹ്‍ന ആവർത്തിക്കുന്നു​. നീനുവിനെ മാനസികരോഗത്തിന്​ ചികിത്സിച്ചതായി പിതാവ്​ ചാക്കോയും പറഞ്ഞിരുന്നു. നീനുവി​​​െൻറ മാനസികനില പരിശോധിക്കാന്‍ മെഡിക്കല്‍ ബോര്‍ഡ്​ രൂപവത്​കരിക്കണമെന്ന്​ ​ ചാക്കോയുടെ അഭിഭാഷകൻ കോടതിയില്‍ ആവശ്യപ്പെട്ടിരുന്നു.

എന്നാല്‍, നീനുവിന് കൗണ്‍സലിങ് മാത്രമാണ് നല്‍കിയതെന്നും എല്ലാകാര്യങ്ങളും നീനു പറഞ്ഞിട്ടുണ്ടെന്നും ഡോക്ടര്‍ കോടതിയെ അറിയിച്ചിട്ടുണ്ട്. നീനുവിന്​ മാനസികരോഗമുണ്ടെന്ന്​ തെളിയിക്കാനാവശ്യമായ രേഖകളൊന്നും ഹാജരാകാൻ മാതാപിതാക്കൾക്ക്​ കഴിഞ്ഞിട്ടില്ല. രഹ്​നയുടെ ആരോപണങ്ങളെല്ലാം നിഷേധിച്ച നീനു, എല്ലാപ്രശ്​നങ്ങൾക്കും കാരണം മാതാവാണെന്ന്​ കുറ്റപ്പെടുത്തിയിരുന്നു.